بارلىق وڭىردە ەڭبەكپەن قامتۋ جانە الەۋمەتتىك وڭالتۋ ورتالىقتارى جۇمىس ىستەۋى ءتيىس - مەملەكەت باسشىسى
بۇل تۋرالى بۇگىن ۇلتتىق قوعامدىق سەنىم كەڭەسىنىڭ ەكىنشى وتىرىسىندا ق ر پرەزيدەنتى قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.
«مۇمكىندىگى شەكتەۋلى ازاماتتارعا قولداۋ كورسەتۋدىڭ ءتيىمدى جۇيەسىن ەنگىزۋ قاجەت. ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنە جۇگىنسەك، ەلىمىزدەگى 106 مىڭ مۇمكىندىگى شەكتەۋلى ادامنىڭ 25 پايىزى عانا جۇمىسپەن قامتىلعان. جۇمىس بەرۋشىلەر مۇمكىندىگى شەكتەۋلى ادامداردى قابىلداۋى ءۇشىن ارنايى كۆوتا ءبولۋى ءتيىس»، - دەدى مەملەكەت باسشىسى.
وسى ورايدا قازاقستان پرەزيدەنتى ەل ۇكىمەتىنە اتالعان مىندەتتىڭ ورىندالۋ بارىسىن قاداعالاۋدى تاپسىردى.
«ورىنداماعان جاعدايدا وتەماقى تولەۋ ماسەلەسىن قاراستىرۋى كەرەك. بارلىق ايماقتاردا ەڭبەكپەن قامتۋ جانە الەۋمەتتىك وڭالتۋ ورتالىقتارى جۇمىس ىستەۋى ءتيىس. اقمولا، اقتوبە، الماتى جانە باتىس قازاقستان وبلىستارى مەن نۇر- سۇلتان، شىمكەنت قالاسىندا مۇنداي ورتالىقتار جوق. بۇل ۇلكەن كەمشىلىك. سوندىقتان مۇنداي ورتالىقتاردى قالايدا اشۋدى تاپسىرامىن. وسى جۇمىستى مەملەكەت پەن جەكەمەنشىكتىڭ ارىپتەستىگى ارقىلى ىسكە اسىرۋعا بولادى»، - دەدى ق. توقايەۆ.
مەملەكەت باسشىسى سونىمەن قاتار جۇمىس ىستەيتىن مۇمكىندىگى شەكتەۋلى ادامدارعا وڭالتۋ كومەگىن مەملەكەتتىك- الەۋمەتتىك ساقتاندىرۋ قورىنىڭ قارجىسى ەسەبىنەن بەرۋ ماسەلەسىن قاراستىرۋدى ۇسىندى.
اۆتور: مارلان جيەمباي
