مەملەكەت باسشىسى: بىزگە پارلامەنتتىك وپپوزيتسيا ينستيتۋتى قاجەت

نۇر-سۇلتان. قازاقپارات - ءبىزدىڭ قوعام پارتيا قۇرىلىسىنىڭ جاڭا ساپالىق كەزەڭىنە وتەتىندەي دارەجەگە جەتتى.

بۇگىن ۇلتتىق قوعامدىق سەنىم كەڭەسىنىڭ 2-وتىرىسىندا ق ر پرەزيدەنتى قاسىم-جومارت توقايەۆ وسىلاي ءمالىم ەتتى، دەپ حابارلايدى قازاقپارات ءتىلشىسى.

«بىزگە پارلامەنتتىك وپپوزيتسيا ينستيتۋتى قاجەت. ءبىز جاڭا قوعامدىق پاراديگمانىڭ باستى شارتى بالاما كوزقاراستار مەن پىكىرلەر ەكەنىن ءتۇسىنۋىمىز كەرەك. سوڭعى جىلدارى ءوز ۇستانىمدارىن اشىق ءبىلدىرىپ جۇرگەن بەلسەندى ازاماتتار ءبىرقاتار الەۋمەتتىك-ەكونوميكالىق ماسەلەلەردى شەشۋگە اتسالىستى. ءبىز بالاما پىكىرلەر مەن قوعامدىق تالقىلاۋ توقىراۋدىڭ باستاۋى ەمەس، كەرىسىنشە، دامۋدىڭ باستى تالاپتارىنىڭ ءبىرى ەكەنىنە كوز جەتكىزدىك»، - دەدى پرەزيدەنت.

مەملەكەت باسشىسىنىڭ اتاپ وتۋىنشە، «پارلامەنت تۋرالى» زاڭدى ساياسي ازشىلىققا كەپىلدىك بەرەتىن نورمالارمەن تولىقتىرۋ قاجەت.

«سوندىقتان پارلامەنتتەگى ساياسي ازشىلىقتىڭ نەگىزىن زاڭ جۇزىندە بەكىتۋ قاجەت. بۇل ءۇشىن «پارلامەنت تۋرالى» زاڭدى ساياسي ازشىلىققا كەپىلدىك بەرەتىن نورمالارمەن تولىقتىرۋ قاجەت. مىسالى، باسقا دا پارتيالاردىڭ وكىلدەرى پارلامەنتتەگى كەيبىر كوميتەتتەردىڭ ءتوراعاسى لاۋازىمدارىن يەلەنە الاتىنداي جاعداي جاساۋ كەرەك. بۇل بيلىكتىڭ زاڭ شىعارۋ تارماعىنداعى بالامالى قىزمەتتىڭ جۇيەلى جۇمىسىن قامتاماسىز ەتۋگە مۇمكىندىك بەرەدى» ، - دەدى ق. توقايەۆ.

اۆتور: رۋسلان عابباسوۆ