سارىارقا ماگيسترالدى گاز قۇبىرى ناقتى قاشان ىسكە قوسىلادى؟
«وتاندىق گاز ەكسپورتىنىڭ ءوسۋى جانە ءترانزيتتى ۇلعايتۋ ەلىمىزدىڭ وڭىرلەرىن گازداندىرۋ جوبالارىن قارجىلاندىرۋعا جانە حالىق ءۇشىن گاز باعاسىنىڭ تۇراقتىلىعىن قامتاماسىز ەتۋگە مۇمكىندىك بەرىپ وتىر. بيىل وڭىرلەردە اكىمدىكتەرمەن بىرلەسىپ، گاز ينفراقۇرىلىمىن سالۋ بويىنشا شامامەن 73 جوبا ىسكە استى. ەلىمىز بويىنشا گازداندىرۋ دەڭگەيى 50 پايىزدان اسادى. بيىل 31- جەلتوقسانعا قاراي ەنەرگەتيكا مينيسترلىگى جىلدىڭ باس جوباسى - سارىارقا ماگيسترالدى قۇبىرىن سالتاناتتى تۇردە ىسكە قوسۋدى جوسپارلاپ وتىر»، - دەدى اسەت ماعاۋوۆ و ك ق- دا وتكەن باسپا ءسوز ءماسليحاتىندا.
ونىڭ ايتۋىنشا، 5 اۆتوماتتاندىرىلعان گاز تاراتۋ ستانساسى، گاز ولشەۋ ستانساسى جانە باسقارۋ پۋنكتى بار گاز قۇبىرى پايدالانۋعا بەرىلەدى.
«قاراعاندى وبلىسىندا 2020-جىلعى قاڭتار ايىندا العاشقى تۇتىنۋشىلار گازعا قوسىلادى. اتاپ ايتسام، جەزقازعان قالاسى تالاپ كەنتىندەگى 8 كوشەدە - 148 تۇرعىن ءۇي جانە پريستانتسيوننىي كەنتىندەگى 2 كوشەدەگى (بالقاش جانە تەمىر جول كوشەلەرى) - 100 ءۇي، تەمىرتاۋ قالاسىنىڭ س. رازين كوشەسىندەگى 100 ۇيگە، قاراعاندى قالاسىنداعى بادين، وليمپييسكايا، زاۆودسكايا كوشەلەرىندەگى 150 ۇيگە گاز بەرىلەدى»، - دەدى ول.
