قازاقستاندا قوناقۇيلەر شەتەلدىك قوناقتارى تۋرالى اقپارات بەرۋگە مىندەتتەلەدى

نۇر- سۇلتان. قازاقپارات - شەتەلدىكتەر بەس كۇننىڭ ىشىندە قازاقستاندا تىركەلۋ تۋرالى مىندەتتەن بوساتىلادى. بۇل شارالار قوناقۇيلەرگە مىندەتتەلمەك. بۇل تۋرالى ق ر باس پروكۋرورىنىڭ ورىنباسارى مارات احمەتجانوۆ ءمالىم ەتتى، دەپ حابارلايدى قازاقپارات ءتىلشىسى.

«بۇگىندە شەتەل ازاماتتارى بەس كۇن ىشىندە كوشى-قون ورگاندارىندا تىركەۋدەن ءوتۋى ءتيىس. ەندى بۇل نورما جويىلادى. قوناقۇيلەر جانە قابىلداۋشى تاراپ شەتەل ازاماتىنىڭ كەلگەنى جايىندا كوشى-قون ورگاندارىنا وزدەرى حابارلاۋى ءتيىس بولادى. بۇل ءوز كەزەگىندە قازاقستاننىڭ قوناقجايلىعىنا وڭتايلى اسەر ەتەدى. وزدەرىڭىز بىلەسىزدەر، بۇعان دەيىن كوڭىل كونشىتپەيتىن وقيعالار بولعان، ياعني قوناقۇيلەر تەكسەرىلىپ، رەيدتەر بارىسىندا ازاماتتاردىڭ تىركەۋى تەكسەرىلگەن ەدى. وسى جاعدايلار ينۆەستيتسيالىق تارتىمدىلىققا اسەر ەتىپ، باسقا دا سالدارعا الىپ كەلۋى مۇمكىن»، - دەدى م. احمەتجانوۆ سەناتتا تىلشىلەر ساۋالىنا جاۋاپ بەرە وتىرىپ.

ونىڭ سوزىنە قاراعاندا، ەندى قابىلداۋشى تاراپ كوشى-قون ورگاندارىنا قونىستانعان ادامدار تۋرالى مالىمەت بەرۋگە مىندەتتى بولادى، ال شەتەل ازاماتتارى بۇل مىندەتتەن بوساتىلادى. ەگەر دە قابىلداۋشى تاراپ نەمەسە قوناق ءۇي ءتيىستى اقپاراتتى بەرمەسە، وندا اكىمشىلىك كودەكستەگى جاۋاپقا تارتىلادى.

«باستى ماقسات - شەتەلدىك تۋريستەردى وسىنداي مىندەتتەن بوساتۋ. شەتەل ازاماتتارى تىركەلەتىن ورگاندى ىزدەپ، اۋرەگە تۇسپەيدى. بۇل نورما تەك شەتەل ازاماتتارىنا قاتىستى بولىپ وتىر»، - دەدى باس پروكۋروردىڭ ورىنباسارى.