قازاقستاندىق بەس اۋىر اتلەت دوپينگپەن ۇستالدى
التى كاسىپقوي اۋىر اتلەتتىڭ سىناماسىنان تىيىم سالىنعان «تەستوستەرون» انابوليكالىق ستەرويدتەرى تابىلعان.
24-31- ناۋرىز كۇندەرى قىزىلوردا قالاسىندا وتكەن 20 جاسقا دەيىنگى قىزدار جانە جاس وسپىرىمدەر اراسىنداعى قازاقستان چەمپيوناتى كەزىندە سپورتشىلارعا دوپينگ تەكسەرىس جۇرگىزىلگەن.
جارىستا توپ جارعان اسىلجان بەكتاي (81 كەلى)، الىشەر سەيتقازى (102 كەلى)، گۇلدانا ءجۇنىس (64 كەلى) جانە ارۋجان كولباي (71 كەلى)، سونداي-اق كۇمىس جۇلدەگەر ەراسىل كەنەسبايەۆتىڭ (96 كەلى) قان سىناماسىنان تىيىم سالىنعان پرەپاراتتىڭ ءىزى تابىلعان.
قازاقستاننىڭ دوپينگكە قارسى ورتالىعى جانىنداعى WADA تاۋەلسىز كوميسسياسى تىيىم سالىنعان پرەپاراتتى قولدانعان بەس سپورتشىنى ەكى جىلعا، ال ولاردىڭ جاتتىقتىرۋشىلارى تالعات ابەن مەن ايبول كولبايەۆتى ءتورت جىلعا شەتتەتتى.
«قازاقستان دوپينگكە قارسى ورتالىعىنىڭ مۇنداي شەشىم قابىلداۋىنا تولىق نەگىز بار. فەدەراتسياسى دوپينگ قولدانۋعا تۇبەگەيلى قارسى، سول سەبەپتى ق د ق و كومەگىمەن ەل ىشىندە دوپينگكە قارسى كۇرەس جۇرگىزىپ كەلەمىز. ۇلتتىق قۇراما ءۇش جىلدان بەرى حالىقارالىق جارىستاردا بىردە-ءبىر مارتە ەرەجە بۇزىپ كورمەدى. بۇل رەسپۋبليكالىق دەڭگەيدەگى جارىستارداعى قاتاڭ تەكسەرىستىڭ ارقاسى»، - دەلىنگەن قازاقستان اۋىر اتلەتيكا فەدەراتسياسىنىڭ اتقارۋشى ديرەكتورى الديار ءنۇرالينوۆتىڭ مالىمدەمەسىندە.
ايتا كەتەيىك، كۇنى كەشە ق ر پرەزيدەنتى قاسىم-جومارت توقايەۆ «ق ر سپورت جانە دەنە شىنىقتىرۋ تۋرالى كەيبىر زاڭنامالىق اكتىلەرىنە وزگەرتۋلەر مەن تولىقتىرۋلار تۋرالى» زاڭعا قول قويدى.
زاڭ دوپينگكە قارسى ەرەجەلەردى بۇزعانى ءۇشىن جاۋاپكەرشىلىكتى قاتاڭداتۋعا، ۇلتتىق دوپينگكە قارسى ۇيىمنىڭ مارتەبەسىن كۇشەيتۋگە باعىتتالعان. قولدانىستاعى زاڭناماعا دوپينگكە قارسى ەرەجەلەردى بۇزعانى ءۇشىن جاۋاپكەرشىلىكتى قاتاڭداتۋ بويىنشا وزگەرىستەر مەن تولىقتىرۋلار ەنگىزۋ، اتاپ ايتقاندا سپورتشىعا دوپينگ تاعايىنداعان ادامدارعا قاتىستى اكىمشىلىك جاۋاپكەرشىلىكتى ەنگىزۋ قاجەتتىلىگى تۋىندادى، ول 200 ايلىق ەسەپتىك كورسەتكىش مولشەرىندە ايىپپۇل تۇرىندە جازانى كوزدەيدى.
Massaget.kz
