سەناتتا قاساقانا قىلمىستار ءۇشىن جاۋاپتىلىقتى كۇشەيتۋ ماسەلەسى قارالدى
«زاڭ جوباسىنىڭ ءبىرىنشى بلوگى مەملەكەت باسشىسى قاسىم-جومارت توقايەۆتىڭ تاپسىرماسىن قامتيدى. ولار جەكەلەگەن قاساقانا قىلمىستار ءۇشىن جاۋاپتىلىقتى قاتايتۋ تۋرالى. اتاپ ايتساق، ۇرلىق، زورلاۋ، ەسىرتكى تاراتۋ، براكونەرلىك، ماس كۇيىندە كولىك جۇرگىزۋگە بايلانىستى بولىپ وتىر»، - دەدى ق ر باس پروكۋرورىنىڭ ورىنباسارى مارات احمەتجانوۆ.
سونىمەن قاتار باس پروكۋروردىڭ ورىنباسارى زاڭ جوباسىندا مال ۇرلىعىنا قاتىستى جاڭا باپ ەنگىزىلگەنىن اتاپ ءوتتى. جالپى، ۇرلىق، توناۋ جانە قاراقشىلىق ماقساتىندا ءۇي-جايعا، قويماعا، كولىك قۇرالىنا زاڭسىز بۇزىپ كىرۋمەن جاسالعان قىلمىستار ءۇشىن جاۋاپتىلىق كۇشەيمەك. ۇرلىققا قاتىستى ارەكەتتەر اۋىر قىلمىستار ساناتىنا كوشەدى.
«زاڭسىز ەسىرتكى اينالىمى ءۇشىن زاڭناما تالاپتارى كۇشەيتىلەدى. ەلەكتروندىق اقپارات رەسۋرستارى ارقىلى ەسىرتكى تاراتۋ، ەسىرتكىنى ناسيحاتتاۋ مەن جارناما ءۇشىن قىلمىسقا جاۋاپكەرشىلىك ارتادى»، - دەدى م. احمەتجانوۆ.
بۇدان بولەك ول زاڭسىز اڭشىلىق پەن زاڭسىز بالىق اۋلاۋعا توسقاۋىل قويۋ ماسەلەسىنە ەرەكشە ەكپىن جاسالىپ وتىرعاندىعىن اتاپ ءوتتى. سونىمەن قاتار، كيىك جانۋارىنا قاتىستى جاۋاپتىلىق كۇشەيتىلمەك. تابيعاتىمىزدى، اڭ قۇستارىمىزدى قورعايتىن ينسپەكتوردى جانە قورىقشىنىڭ ومىرىنە قاۋىپ ءتوندىرىپ، كۇش قولدانعانى ءۇشىن جاۋاپكەرشىلىك ەنگىزۋ قاراستىرىلعان.
ەسكە سالا كەتەيىك، قاراشا ايىندا اتالعان زاڭ جوباسىن تالقىلاۋ بارىسىندا مارات احمەتجانوۆ مال ۇرلىعىنا قاتىستى قىلمىس تۇرىمەن كۇرەستى كۇشەيتىپ، جاۋاپتىلىقتى قاتاڭداتۋ كەرەكتىگىن ايتقان بولاتىن.
