حالىق ءارتىسى دوسحان جولجاقسىنوۆ دۇنيەجۇزىلىك «قازاق كۇرەسى» فەدەراتسياسىنىڭ قۇرمەتتى پرەزيدەنتى اتاندى

نۇر-سۇلتان. قازاقپارات - اكتەر ءارى رەجيسسەر، قازاقستاننىڭ حالىق ءارتىسى دوسحان جولجاقسىنوۆ دۇنيەجۇزىلىك «قازاق كۇرەسى» فەدەراتسياسىنىڭ «قۇرمەتتى پرەزيدەنتى» بولىپ سايلاندى، دەپ حابارلايدى قازاقپارات ءتىلشىسى.

الىس-جاقىن شەت ەلدەردىڭ وكىلدەرىنىڭ قاتىسۋىمەن ەلوردادا دۇنيەجۇزىلىك «قازاق كۇرەسى» فەدەراتسياسىنىڭ حالىقارالىق كونگرەسى ءوتىپ جاتىر. جيىن بارىسىندا فەدەراتسيا پرەزيدەنتى اليك شپەكبايەۆ الەمنىڭ 27 ەلىنەن كەلگەن فەدەراتسيا مۇشەلەرىنە ۇسىنىس ءبىلدىردى. ول بويىنشا فەدەراتسيانىڭ «قۇرمەتتى پرەزيدەنتى» رەتىندە دوسحان جولجاقسىنوۆتى، ءبىرىنشى ۆيتسە-پرەزيدەنتى رەتىندە بادەلحان كامالحان ۇلىن سايلاۋ ۇسىنىلدى. كوپشىلىك ءبىر اۋىزدان قولدادى.

جيىننىڭ كۇن تارتىبىندە فەدەراتسيا القا مۇشەلەرىنىڭ سايلانۋىمەن قاتار، باسقا دا ماسەلەلەر قاراستىرىلماق.

ايتا كەتەرلىگى، 2019 -جىلدىڭ 20-21-جەلتوقسان ارالىعىندا نۇر-سۇلتاندا قازاق كۇرەسىنەن VIII الەم بىرىنشىلىگى وتكىزىلەدى. وعان 40 قا تارتا مەملەكەتتەن 300 گە جۋىق سپورتشى (ەرلەر مەن ايەلدەر) قاتىسادى. «داۋلەت» سپورت كەشەنىندە وتەتىن بايراقتى باسەكە بارىسىندا ەرلەر (6 سالماق) مەن ايەلدەر (6 سالماق) اراسىندا 12 سالماق دارەجەسىندە جۇلدەلەر ساراپقا سالىنباق. الەم بىرىنشىلىگىنىڭ سالتاناتتى اشىلۋى جوعارىدا اتالعان سپورت كەشەندە 20-شى جەلتوقسان كۇنى ساعات 16.00 گە جوسپارلانعان.

اتالعان الەم چەمپيوناتى بىرىككەن كۇرەس (United World Wrestling) الەمىنىڭ  2019 -جىلعا ارنالعان رەسمي كۇنتىزبەسىنە ەنگەن جانە جارىستار تولىقتاي UWW رەسمي وكىلدەرى مەن حالىقارالىق دارەجەدەگى تورەشىلەرىنىڭ قاتىسۋىمەن وتكىزىلمەك. ەل جانكۇيەرلەرى «Qazsport» تەلەارناسى ارقىلى دودالى جارىستىڭ بەلدەسۋلەرىن تاماشالاي الادى.

جارىستى ۇيىمداستىرۋشىلار - بىرىككەن كۇرەس الەمى، نۇر- سۇلتان قالاسىنىڭ اكىمدىگى، دۇنيەجۇزىلىك «قازاق كۇرەسى» فەدەراتسياسى. الەم چەمپيوناتى «Eurasian Resources Group» قولداۋىمەن وتكىزىلمەك.

اۆتور: ايان بەكەن ۇلى