بەردىبەك ساپاربايەۆ جاڭاوزەن تۇرعىندارىمەن كەزدەستى
كەزدەسۋگە ماڭعىستاۋ وبلىسىنىڭ اكىمى سەرىكباي تۇرىموۆ، ەڭبەك جانە الەۋمەتتىك قورعاۋ ءمينيسترى ءبىرجان نۇرىمبەتوۆ، ۆيتسە- مينيسترلەر: ءبىلىم جانە عىلىم - شولپان كارينوۆا، دەنساۋلىق ساقتاۋ - ءلاززات اقتايەۆا، مادەنيەت جانە سپورت - ەلدوس رامازانوۆ، اقپارات جانە قوعامدىق دامۋ - دانيا ەسىن، سونىمەن قاتار كاسىپوداق فەدراتسياسىنىڭ ءتوراعاسى ەرالى تۇعجانوۆ قاتىستى.
ۆيتسە-پرەمەر ءسوز سويلەۋ كەزىندە تۇرعىنداردى مەملەكەت باسشىسىنىڭ ازاماتتاردىڭ ءال-اۋقاتىن ارتتىرۋ، ءبىلىم بەرۋ، دەنساۋلىق ساقتاۋ، الەۋمەتتىك قورعاۋ سالالارىن دامىتۋعا ارنالعان تاپسىرماسىنىڭ جۇزەگە اسۋ بارىسىنان حاباردار ەتتى.
بەردىبەك ساپاربايەۆ جاڭاوزەندىكتەردى مەملەكەتتى، ونىڭ ىشىندە «ەڭبەك» باعدارلاماسىن قولداپ ءتۇرلى شارالار ۇيىمداستىرۋعا شاقىردى.
«بىرگە جۇمىس ىستەپ، قيىن ماسەلەلەردى شەشۋ، ازاماتتاردىڭ ءومىر ساپاسىن جاقسارتىپ، جۇمىسپەن قامتىلۋىن قاداعالاۋ - ءبىزدىڭ ورتاق مىندەتىمىز. ەگەر ارنايى ماماندىعى جوق بولسا - «ەڭبەك» باعدارلاماسى بويىنشا كاسىبي ءبىلىم الىپ، كاسىپكەرلىكتىڭ قىر-سىرىن ۇيرەنىپ، قايتارىمسىز گرانت نەمەسە جەڭىلدىكپەن ميكروكرەديت الۋعا بولادى. باستىسى، بوس وتىرماۋ كەرەك»، - دەپ اتاپ ءوتتى ۇكىمەت باسشىسىنىڭ ورىنباسارى.
ونىڭ ايتۋىنشا، ۇكىمەت وبلىس اكىمدىگىمەن جانە «اتامەكەن» ۇ ك پ بىرىگىپ جاڭاوزەننىڭ ەڭبەك نارىعىن زەرتتەپ، 2 مىڭعا جۋىق جۇمىسسىز ازاماتتار بارىن انىقتاعان.
«ءبىز ولاردى جۇمىسپەن قامتىپ، گرانتتار مەن ميكرونەسيەلەر ءبولىپ، كاسىپكەرلىكتىڭ قىر- سىرىنا ۇيرەتىپ، بىلىكتىلىگىن ارتتىرىپ، جاڭا جانە جۇمىس ىستەپ تۇرعان كاسىپورىندارعا جۇمىسقا تۇرعىزۋعا نيەتتىمىز»، - دەدى بەردىبەك ساپاربايەۆ.
ۆيتسە-پرەمەر ءسوز سويلەگەننەن كەيىن كەزدەسۋ «ەركىن ميكروفون» فورماتىندا جالعاسىن تاۋىپ، جاڭاوزەندىكتەر وزدەرىن الاڭداتقان سۇراقتاردى قويدى.
قالا تۇرعىندارى ەڭبەككە تارتۋ، كوشەلەردى ساپاسىز تازالاۋ مەن كوگالداندىرۋ، ەسكى ۇيلەردى بۇزۋ، تۇرعىن ءۇي ماسەلەلەرىن شەشۋ، از قامتىلعان جانە كوپ بالالى وتباسىلاردى قولداۋ ورتالىعىن اشۋ سىندى ماسەلەلەردى كوتەردى. بارلىق سۇراقتارعا ءتيىستى جاۋاپ بەرىلىپ، تۇسىنىكتەمەلەر ايتىلدى.
19-جەلتوقسان، بەيسەنبى كۇنى ۇكىمەتتىڭ جۇمىس توبى اقتاۋداعى جۇمىسىن جالعاستىرىپ، ايماق تۇرعىندارىمەن، دەنساۋلىق ساقتاۋ، ءبىلىم بەرۋ سالاسىنىڭ قىزمەتكەرلەرى، جاستارمەن كەزدەسىپ، ءبىرقاتار الەۋمەتتىك وشاقتاردى ارالايدى.
