مەكتەپ ديرەكتورلارىن جاڭا جۇيەمەن تاعايىندايمىز - اسحات ايماعامبەتوۆ
بۇل تۋرالى بۇگىن ۇكىمەت وتىرىسىندا ق ر ءبىلىم جانە عىلىم ءمينيسترى اسحات ايماعامبەتوۆ ايتتى، دەپ حابارلايدى قازاقپارات ءتىلشىسى.
«ءبىلىم بەرۋدى باسقارۋ، قارجىلاندىرۋ دا وتە وزەكتى پروبلەمالاردىڭ ءبىرى. وسىعان وراي 2021 -جىلدان باستاپ اۋداندىق ءبىلىم بولىمدەرىن باسقارۋ وبلىستىق دەڭگەيگە اۋىسادى. قارجىلاندىرۋ دا وبلىستىق دەڭگەيگە كوتەرىلەتىن بولادى. ول وڭىرلەر مەن مەكەمەلەر اراسىنداعى ءبىلىم الشاقتىعىن ازايتۋعا، جەتكىلىكتى دەڭگەيدە قارجىلاندىرۋعا باعىتتالادى»، - دەدى 2025 -جىلعا دەيىن قازاقستاندا ءبىلىم مەن عىلىمدى دامىتۋدىڭ مەملەكەتتىك باعدارلاماسىن تانىستىرعان اسحات ايماعامبەتوۆ.
سونىمەن قاتار مينيستر كەيىنگى كەزدەرى ءبىلىم بەرۋ مەكەمەلەرىنىڭ باسشىلارىن تاعايىنداۋ تارتىبىنە قاتىستى سۇراقتار كوبەيىپ وتىرعانىن ايتتى.
«مىسالى ءبىرقاتار ۇيىم باسشىسى 20 جىلدان استام ۋاقىتتان بەرى ءبىر ورىندا جۇمىس اتقارۋدا. باسقارۋ مەنەدجمەنتى بويىنشا دا بۇگىنگى كۇنى شىنىن ايتۋ كەرەك، سۇراقتار كوپ جانە بۇل ماسەلە سىن كوتەرمەيدى. سوندىقتان بالاباقشا، مەكتەپ، كوللەدج ديرەكتورلارىن جاڭا جۇيەدە تاعايىندايتىن بولامىز. وعان قوسا، الداعى ۋاقىتتا روتاتسيالاۋ ارقىلى اۋىستىرۋ جۇيەسىن دە قولدانامىز. زاماناۋي تالاپتارعا سايكەس دەربەس باسقارۋدان كورپوراتيۆتى باسقارۋعا ءبىلىم سالاسى دا كوشەتىن بولادى»، - دەدى ول.
اۆتور: مارلان جيەمباي
