اسحات ايماعامبەتوۆ: پەداگوگتەردىڭ ەڭبەگىن نورمالاۋ جۇيەسىن ەنگىزەمىز

نۇر-سۇلتان. قازاقپارات - قازاقستاندا پەداگوگتەردىڭ ەڭبەگىن نورمالاۋ جۇيەسى ەنگىزىلەدى. اتالعان قۇجاتتى بۇگىن ۇكىمەت وتىرىسىندا ق ر ءبىلىم جانە عىلىم ءمينيسترى اسحات ايماعامبەتوۆ تانىستىردى، دەپ حابارلايدى قازاقپارات ءتىلشىسى.

«ءبىز جوبادا پەداگوگتەردىڭ مارتەبەسىن ءبىرىنشى ورىنعا قويىپ وتىرمىز. مەملەكەت باسشىسىنىڭ تاپسىرماسىنا ساي 4 جىل ىشىندە 500 مىڭ پەداگوگتىڭ ەڭبەكاقىسىن 2 ەسەگە ۇلعايتۋ قاراستىرىلعان. مۇعالىمدەردى قايتا دايارلاۋ، بىلىكتىلىكتى ارتتىرۋدىڭ جاڭا جۇيەسى ەنگىزىلەتىن بولادى. مۇنان بىلاي بالاباقشا، قوسىمشا ءبىلىم جانە كوللەدج پەداگوگتەرى، ولاردىڭ باسشىلارى اتتەستاتتاۋدان ءوتىپ، جالاقىسى ارتاتىن بولادى. پەداگوگتەردىڭ ەڭبەگىن نورمالاۋ جۇيەسىن ەنگىزەمىز جانە 2021 -جىلدان باستاپ ۋنيۆەرسيتەتتەردىڭ تۇلەكتەرى رەتتەلەتىن ماماندىقتار بويىنشا سەرتيفيكاتتاۋدان وتەتىن بولادى»، - دەدى 2025 -جىلعا دەيىن قازاقستاندا ءبىلىم مەن عىلىمدى دامىتۋدىڭ مەملەكەتتىك باعدارلاماسىن تانىستىرعان مينيستر.

سونىمەن قاتار ونىڭ ايتۋىنشا، پەداگوگيكالىق ءبىلىمدى جاڭعىرتۋ، بولاشاق مۇعالىمدەردىڭ پەداگوگيكالىق پراكتيكاسىن وزگەرتۋ جانە ونى ۇلعايتۋ، وقۋ باعدارلامالارىن جالپى 100 پايىزعا جاڭارتۋ قاراستىرىلعان. 3-6 جاستاعى بالالاردى بالاباقشامەن 100 پايىز قامتۋ جوسپارلانعان.

«ساپانى ارتتىرۋ ماقساتىندا ولاردى ليتسەنزيالاۋدى كەزەڭدەپ قايتارۋ جانە بالالاردى مەكتەپكە دايارلاۋدى جاقسارتۋ ءۇشىن جاڭا باعدارلامالار ەنگىزۋ كوزدەلگەن. ءبىز بۇگىن كۇندە كورىپ وتىرمىز، جەكەمەنشىك بالاباقشالاردا ءارتۇرلى كەلەڭسىز جاعدايلار كوبەيىپ كەتتى. سوندىقتان كەزەڭ- كەزەڭمەن ليتسەنزيالاۋ ماسەلەسىن دە قولعا العان ءجون دەپ ۇيعاردىق. وڭىرلەردىڭ جەكەمەنشىك بالاباقشالارىنىڭ ۇسىنىسى بويىنشا مەملەكەتتىك تاپسىرىس قۇنى 30 مىڭ تەڭگەگە دەيىن جەتكىزىلەدى. ول ءۇشىن رەسپۋبليكالىق بيۋدجەتتەن 400 ميلليارد تەڭگەدەن استام قارجى قاراستىرىلىپ وتىر»، - دەدى ول.

اۆتور: مارلان جيەمباي