قازاقستاننىڭ ەڭ ۇزدىك شاحماتشىسى كەيبىر جاس جەتكىنشەكتەردەن جەڭىلىپ قالعان

الماتى. SPORTINFORM - قازاقپارات - الماتىدا شاحمات رەيتينگىنىڭ ءنومىرى ءبىرىنشى ويىنشىسى، قازاقستاننىڭ ۇلتتىق قۇراماسىنىڭ مۇشەسى رينات جۇمابايەۆ جاس جەتكىنشەكتەرمەن شاحمات سەانسىن وتكىزدى، دەپ حابارلايدى «SPORTINFORM» س ا ا.

قازاقستاننىڭ شاحمات فەدەراتسياسىنىڭ رەيتينگى بويىنشا ەلىمىزدىڭ ەڭ مىقتى شاحماتشىسى الماتىدا بالالارمەن 28 تاقتادا قايىرىمدىلىق سەانسىن وتكىزدى. شارا تاۋەلسىزدىك كۇنى مەرەكەسىنە ارنالدى.

ايتا كەتەتىن ماسەلە، شاراعا قازاقستاننىڭ تاۋەلسىزدىگىنە قانشا جىل تولسا، سونشا ويىنشى قاتىسى. ويىنشىلاردىڭ كەيبىرى ەلىمىز بەن الماتى قالاسىنىڭ، ءتىپتى ازيا چەمپيوناتتارىنىڭ جۇلدەگەرلەرى.

جاس جەتكىنشەكتەردى ءاپ-ساتتە-اق ۇتا سالماق بولعان گروسمەيستەردىڭ سوزىنشە، بالالارمەن باق سىناسۋ وعان وڭايعا سوقپاعان. ءسويتىپ، بولاشاق چەمپيوندارمەن 4 ساعات بويى ارپالىسقان گروسمەيستەر بالالاردىڭ كەيبىرىمەن تەڭ تۇسسە، كەيبىرىنەن ءتىپتى ۇتىلىپ تا قالعان.