قازاقپارات كۇنتىزبەسى. بۇگىن حالىقارالىق كەدەيلەرگە كومەك كۇنى
اتاۋلى كۇندەر
حالىقارالىق كەدەيلەرگە كومەك كۇنى
مۇنداي اتاۋلى كۇندى بەكىتۋ يدەياسى بۇۇ مۇشەلەرىنىڭ كەزەكتى وتىرىسىندا كوتەرىلدى. ول كونفەرەنسيادا ەكونوميكالىق دامۋدى رەتتەۋ ماسەلەلەرى كوتەرىلدى.
ەستە قالار وقيعالار
1931 -جىلى قاراعاندىنىڭ ەڭبەكپەن- تۇزەۋ لاگەرى اشىلىپ، ورتالىعى قاراعاندى قالاسىنان 45 شاقىرىم جەردەگى دولينكا سەلوسىندا ورنالاستى. قارلاگتىڭ اۋماعى سولتۇستىكتەن وڭتۇستىككە دەيىن 300 شاقىرىم، شىعىستان باتىسقا دەيىن 200 شاقىرىم اۋماقتى الىپ جاتتى. بۇل لاگەردى ۇيىمداستىرۋداعى باستى سەبەپتەردىڭ ءبىرى - ورتالىق قازاقستاندا جەدەل قارقىنمەن ءوسىپ كەلە جاتقان كومىرلى- مەتاللۋرگيالىق ءوندىرىس ورىندارى: قاراعاندى كومىر باسسەينى، جەزقازعان جانە بالقاش مىس بالقىتۋ كومبيناتتارى ءۇشىن ءىرى ازىق-تۇلىك بازاسىن قۇرۋ بولدى.
وسىعان وراي جەرگىلىكتى تۇرعىنداردى ىقتيارسىز قونىس اۋدارتىپ، بوس قالعان جەرگە كوپتەگەن تۇتقىندار كولونناسىن ورنالاستىردى. بۇل كولوننالار باسقارماسى تىكەلەي ماسكەۋگە جانە ن ك ۆ د-عا باعىندى جانە ونىڭ ءوزىنىڭ بيلىگى، قارۋ- جاراعى، كولىگى، پوشتاسى مەن تەلەگراف بايلانىسى بولدى. دولينكانىڭ ايماعى جان- جاعىنان تەمىر تورلارمەن قورشالىپ، وعان كىرۋ ارناۋلى رۇقسات قاعازى ارقىلى جۇزەگە استى. لاگەردىڭ ءىشى تاعى دا ەكى ايماققا ءبولىنىپ، ءاربىر بۇرىشىنا كۇزەت مۇناراسى قويىلدى. جالپى قارلاگ جۇمىس ىستەگەن ۋاقىتتا مۇندا 1 ميلليوننان استام ادام تۇتقىندا بولدى. لاگەر 1959 -جىلى جابىلدى.
1991 -جىلى العاشقى پۋنكتىندە «س س ر و وداقتىق- رەسپۋبليكالىق ورگانى مەملەكەتتىك قاۋىپسىزدىك كوميتەتىنىڭ رەسپۋبليكامىزداعى قۇقىقتىق ميراسقورى بولىپ قازاقستان رەسپۋبليكاسىنىڭ مەملەكەتتىك قاۋىپسىزدىك كوميتەتى دەپ تانىلسىن» دەپ كورسەتىلگەن مينيسترلەر كابينەتىنىڭ «قازاقستان رەسپۋبليكاسىنىڭ مەملەكەتتىك قاۋىپسىزدىك كوميتەتى تۋرالى» قاۋلىسىنا قول قويىلدى. بۇل ەگەمەندى مەملەكەتتىڭ قاۋىپسىزدىك ورگاندارى جۇيەسىنىڭ قۇرىلۋىنىڭ العاشقى قادامى بولدى.
1996 -جىلى قازاقستان سۋديالارىنىڭ ءبىرىنشى سەزى ءوتتى. سەزدە رەسپۋبليكانىڭ سۋديالار وداعى قۇرىلدى جانە سۋديالار ەتيكاسىنىڭ كودەكسى قابىلداندى.
2005 -جىلى الماتىدا قازاقستان جازۋشىلار وداعىنىڭ ادەبيەتشىلەر ۇيىندە قىتايداعى قازاق جازۋشىسى قاجىعۇمار شابدان ۇلىنىڭ «پانا» رومانىنىڭ تانىستىرىلىمى بولىپ ءوتتى. دۇنيە ءجۇزى قازاقتارىنىڭ قاۋىمداستىعى اتالعان شارانى قالامگەردىڭ 80 جاسقا تولۋىنا ورايلاستىرىپ وتكىزدى. «اتاجۇرت» باسپاسىنان جارىق كورگەن بۇل تۋىندىنى اراب قارپىنەن كيريلل جازۋىنا كوشىرگەن - قازاقستاننىڭ حالىق جازۋشىسى قابدەش ءجۇمادىل.
2008 -جىلى تالدىقورعاندا قادىرعالي جالايىريدىڭ ەسكەرتكىشىنىڭ اشىلۋى ءوتتى.
2011 -جىلى ماسكەۋدە جوعارعى ەۋرازيالىق ەكونوميكالىق كەڭەسى جوعارعى ەۋرازيالىق ەكونوميكالىق كەڭەسى وتىرىسىندا قازاقستان، رەسەي جانە بەلارۋس پرەزيدەنتتەرى ەۋرازيالىق ەكونوميكالىق كوميسسيا قۇرۋ تۋرالى قۇجاتقا قول قويدى.
2012 -جىلى قازاقستان رەسپۋبليكاسى ەكونوميكالىق ىنتىماقتاستىق پەن دامۋ ۇيىمىنىڭ (ە ى د ۇ) ورتا ازيالىق باستاماسىنىڭ تەڭ ءتوراعاسى بولدى.
2012 -جىلى تەحاس شتاتىنىڭ حيۋستون قالاسىندا ا ق ش-تاعى العاشقى قازاق مەكتەبىنىڭ رەسمي اشىلۋى ءوتتى.
2016 -جىلى استانادا العاش رەت Saryarka short film festival قىسقا مەتراجدى فيلمدەر جاستار فەستيۆالى ءوتتى. كينوفەستيۆال باعدارلاماسىنا 23 فيلم مەن 5 كونكۋرستان تىس جۇمىس بولدى. باس جۇلدەنى رەجيسسەر دارحان تولەگەنوۆ «مارشرۋت» ءفيلمى ءۇشىن الدى.
2017 -جىلى ۆاشينگتونداعى دۇنيەجۇزىلىك بانكتىڭ ءماجىلىس زالىنا پايىمى تەرەڭ، پاراساتى بيىك قازاق قىزى الما ورازالينوۆانىڭ ەسىمى بەرىلدى.
ءبىلىمدى، ويى ۇشقىر وتانداسىمىز حالىقارالىق قارجى ورتالىعىندا ءوزىنىڭ ىسكەرلىگىمەن ەرەكشە كوزگە تۇسكەن. ومىردەن ەرتە وتسە دە، دانالىعىمەن دارالانعان جەرلەسىمىزدىڭ ەسىمى امەريكا، ۇلىبريتانيا، ءۇندىستان، سينگاپۋر، جاپونيادا ەلدەرىنە ەتەنە تانىمال.
2017 -جىلى قورقىت اتا اتىنداعى حالىقارالىق كونكۋرستىڭ العاشقى سىيلىعىن قازاقستاندىق جازۋشى احمەتجان اشيري «شارباق» اڭگىمەسى ءۇشىن يە بولدى. قورقىت اتا اتىنداعى Ⅱ حالىقارالىق كونكۋرستىڭ ماراپاتتاۋ ءراسىمى تۇركسوي باس حاتشىلىعىندا ءوتتى.
2018 -جىلى جوعارعى سوت كەڭەسىنىڭ رەفورمالار تۋرالى زاڭ جوباسىنىڭ تۇجىرىمداماسى جانە سۋديالاردىڭ تاۋەلسىزدىگىن قامتاماسىز ەتۋگە، ولاردىڭ كاسىبيلىگى مەن ولارعا حالىقتىڭ سەنىمىن ارتتىرۋعا باعىتتالعان قازاقستان رەسپۋبليكاسى سۋديالارىن ىرىكتەۋ جۇيەسى ەۋروپا كەڭەسىنىڭ ۆەنەتسيا كوميسسياسىنان وڭ قورىتىندى الدى.
