ءماجىلىس دەپۋتاتى سەمەي قالاسىنا رەسپۋبليكالىق مارتەبە بەرۋدى ۇسىندى
وسى ورايدا ول ۇكىمەت باسشىسى اسقار ماميننىڭ اتىنا دەپۋتاتتىق ساۋال جولدادى، دەپ حابارلايدى قازاقپارات ءتىلشىسى.
«بۇگىنگى كۇنى اباي جەرى سەمەي وڭىرىندە ءبىرقاتار شارالار قولعا الىندى. سەمەي قالاسى مەن ايماعىن كوتەرۋگە بۇرىن سوڭدى بولماعان قوماقتى قاراجات ءبولىنىپ، گۇلدەنۋىنە كۇش جۇمسالۋدا. ارينە، حالىق تا سەمەي قالاسىنىڭ وسۋىنە، وركەندەۋىنە قۋانۋدا. ويتكەنى سەمەي قالاسىنىڭ گەوگرافيالىق ورنى، ەكونوميكالىق دەڭگەيى، ساياسي مۇراسى وعان ابدەن لايىق»، - دەپ توقتالدى دەپۋتات.
ا. پەرۋاشيەۆ وتكەن جىلى ەلباسى نۇرسۇلتان نازاربايەۆتىڭ جارلىعىمەن ەجەلگى تۇركىستان قالاسى وبلىس ورتالىعىنا اينالىپ، ال شىمكەنت شاھارىنا رەسپۋبليكالىق دارەجە بەرىلگەنىن ەسكە سالدى. بۇل تاريحي شەشىم تۇركىستان ايماعىن بۇكىل تۇركى الەمىنىڭ ورداسى رەتىندە قايتادان نىعايتۋعا جول اشتى. شىمكەنت ءوز مارتەبەسىن تۇسىرمەي، ەلىمىزدىڭ بەتكە ۇستار قالالارىنىڭ ءبىرى رەتىندە ارى قاراي دامۋدا.
«وسى ورايدا كەر زاماندا قازاقتىڭ رۋحىن كوتەرگەن، قازاقتىڭ داۋىسىن جەتكىزىپ، ءيىسىن تانىتقان اباي رۋحىنىڭ ورداسى - سەمەي قالاسىنا دا ءتيىستى مارتەبەسىن بەرۋ ورىندى دەپ سانايمىز. قۇرمەتتى اسقار ۇزاقباي ۇلى، اكىمشىلىك- اۋماقتىق قۇرىلىس تۋرالى زاڭىنىڭ ءۇشىنشى بابىنا سايكەس، رەسپۋبليكالىق ماڭىزى بار قالالار قاتارىنا حالقىنىڭ سانى 1 ميلليون ادامنان اساتىن ەلدى مەكەندەر نەمەسە ەرەكشە مەملەكەتتىك ماڭىزى بار قالالار جاتادى. ءبىزدىڭ ويىمىزشا، سەمەي قالاسى ءدال وسى ەرەكشە مەملەكەتتىك ماڭىزى بار قالا. سوندىقتان وعان رەسپۋبليكالىق مارتەبە بەرۋ جونىندە مەملەكەت باسشىسىنا ۇسىنىس ەنگىزۋ مۇمكىندىگىن قاراستىرۋىڭىزدى سۇرايمىز»، - دەدى ازات پەرۋاشيەۆ.
اۆتور: رۋسلان عابباسوۆ
