دۋبايداعى بۋرج حاليفا قابىرعاسىندا قازاقستان تۋىن بەينەلەۋ ءۇشىن اقى تولەنگەن جوق – س ءى م

نۇر- سۇلتان. قازاقپارات - سىرتقى ىستەر مينيسترلىگى قازاقستاندى تاۋەلسىزدىك كۇنىمەن قۇتتىقتاۋ اكسياسى اقىلى بولعانى تۋرالى اقپاراتتىڭ جالعان ەكەنىن ايتتى.

س ءى م رەسمي وكىلىنىڭ ايتۋىنشا، مۇنداي تاجىريبە ءبىرىنشى رەت بولىپ تۇرعان جوق، دەپ حابارلايدى قازاقپارات ءتىلشىسى.

«كەشە دۋبايداعى بۋرج حاليفانىڭ قاسبەتىن قازاقستان تۋىنىڭ تۇسىنە بوياۋ ءۇشىن اقى تولەندى دەگەن اقپارات بولدى. شىن مانىندە، باستاما دۋباي امىرلىگىنە تيەسىلى. بۇل - تەگىن اكسيا. بۇل تاجىريبە بۇرىننان بار. قازاقستانعا دەيىن وزبەكستان، تۇرىكمەنستان، رەسەي، بەلارۋس جانە باسقا ەلدەردىڭ جالاۋى بەينەلەنگەن. سول كۇنى قابىرعا باحرەين تۋى تۇسىمەن بويالدى»، - دەدى ق ر س ءى م رەسمي وكىلى ايبەك سمادياروۆ.

ونىڭ ايتۋىنشا، ق ر سىرتقى ىستەر مينيسترلىگى 16 - جەلتوقسان كۇنى مەيراممەن وسىلاي قۇتتىقتاۋ ءۇشىن اقى تولەدى دەگەن - جالعان اقپارات.

«مەن مۇنداي اقپارات تاراتاتىن بلوگەرلەر مەن جۋرناليستەردى ار- ۇياتتى ساقتاۋعا شاقىرامىن. اقپاراتتىڭ راس- وتىرىگىنە كوز جەتكىزبەي تۇرىپ تاراتۋ - ولاردىڭ اقىل- ويىنىڭ تارلىعىن جانە اقپاراتتىق ساياساتقا قالاي قارايتىنىن بىلدىرەدى»، - دەيدى س ءى م وكىلى.

ەسكە سالا كەتسەك، دۋباي ەميراتى قازاقستاندىقتاردى تاۋەلسىزدىكتىڭ 28 جىلدىعىمەن ەرەكشە قۇتتىقتاعان بولاتىن. 16 - جەلتوقسان كۇنى الەمدەگى ەڭ بيىك عيمارات - دۋباي قالاسىنداعى بۋرج حاليفا قازاقستان تۋىنىڭ تۇسىنە بويالدى.

اۆتور: زارينا قاھارمان