پرەزيدەنت اتىنا تاۋەلسىزدىك كۇنىنە وراي قۇتتىقتاۋ جەدەلحاتتارى كەلىپ تۇسۋدە

نۇر- سۇلتان. قازاقپارات - قاسىم- جومارت توقايەۆتىڭ اتىنا قازاقستان رەسپۋبليكاسىنىڭ تاۋەلسىزدىك كۇنىنە وراي شەت مەملەكەتتەردىڭ باسشىلارى مەن حالىقارالىق ۇيىمداردىڭ جەتەكشىلەرى اتىنان قۇتتىقتاۋ جەدەلحاتتارى تولاسسىز كەلىپ تۇسۋدە، دەپ حابارلايدى اقوردانىڭ باسپا ءسوز قىزمەتى.

 ب ۇ ۇ باس حاتشىسى انتونيۋ گۋتەرريش قازاقستان حالقىن ۇلتتىق مەرەكەسىمەن قۇتتىقتادى.

«ءبىز بۇگىندە حالىقارالىق ىنتىماقتاستىق بۇرىنعىدان دا اسا قاجەت قيىن زاماندا ءومىر ءسۇرىپ جاتىرمىز. «ءبىز، ب ۇ ۇ حالقى» بەيبىتشىلىك، تۇراقتى دامۋ جانە ادام قۇقىعى اياسىندا ىزگى نيەتپەن بىرىگە الساق، بۇدان بۇكىل الەم ۇتادى»، - دەلىنگەن قۇتتىقتاۋ جەدەلحاتىندا.

ساۋد ارابياسىنىڭ كورولى سالمان بەن ابدەل ازيز ءال ساۋد قاسىم- جومارت توقايەۆتىڭ اتىنا جولداعان قۇتتىقتاۋىندا: «دوستاس قازاقستان حالقىنىڭ ءوسىپ- وركەندەي بەرۋىن، سىزگە زور دەنساۋلىق جانە باقىت تىلەيمىن»، - دەپ جازعان.

فرانسيا پرەزيدەنتى ەممانيۋەل ماكرون فرانسۋز حالقىنىڭ اتىنان قازاقستانعا باق- بەرەكە تىلەگەن.

«ەلدەرىمىز اراسىنداعى قارىم- قاتىناستىڭ جوعارى دارەجەدە ەكەنىن ەرەكشە اتاپ وتكىم كەلەدى. 2018 -جىلدىڭ 18- قازانىندا تۇڭعىش پرەزيدەنت نۇرسۇلتان نازاربايەۆپەن بريۋسسەلدە وتكەن ەۋروپا- ازيا سامميتىنىڭ اياسىندا كەزدەسكەنىمىزدە ەكونوميكانىڭ ءۇش باسىم باعىتى بويىنشا، اتاپ ايتقاندا، اۋىل شارۋاشىلىعى جانە تاعام ءوندىرىسى، سيفرلى دامۋ، ەنەرگيا كوزدەرىن جاڭارتۋ سالالارىندا ىنتىماقتاسا جۇمىس ىستەۋگە ۋاعدالاسقانىمىزدى بىلەسىز. ەندى وسى سالالارداعى باستامالارىمىزدى بىرگە ىسكە اسىرۋىمىز كەرەك. ول ءۇشىن الداعى ون جىلعا باعىتتالعان ستراتەگيالىق ارىپتەستىكتىڭ جول كارتاسىن بىرلەسىپ انىقتاساق ءجون بولار ەدى. بۇل ءبىزدىڭ بىرلەسكەن جاڭا جوبالارىمىزدىڭ ىسكە اسۋىنا كوپ سەپتىگىن تيگىزەدى»، - دەپ جازادى فرانسيا پرەزيدەنتى.

ەممانيۋەل ماكرون قازاقستاننىڭ ۇجىمدىق قاۋىپسىزدىك جانە اتوم ەنەرگياسىن بەيبىت ماقساتتا پايدالانۋ سەكىلدى باستامالارىن قولدايتىنىن ايتقان.

بەلارۋس پرەزيدەنتى الەكساندر لۋكاشەنكو قازاقستان تاۋەلسىزدىك جىلدارىندا الەۋمەتتىك- ەكونوميكالىق دامۋ، تۇراقتىلىق پەن ۇلتتىق كەلىسىمدى قامتاماسىز ەتۋ بويىنشا زور جەتىستىكتەرگە جەتكەنىن اتاپ ءوتتى.

«جاھاندىق قاۋىپسىزدىككە، ەۋرازيا كەڭىستىگىندەگى ينتەگراتسيالىق ۇدەرىستەردى تەرەڭدەتۋگە، وركەنيەتتى قوعام قۇرۋعا ماڭىزدى ۇلەس قوسىپ وتىرعان قازاقستان حالىقارالىق بايلانىستاردا ابىرويلى مەملەكەت رەتىندە بەدەلىن نىعايتتى. ءوزارا سەنىمگە، قولداۋعا جانە تىعىز سەرىكتەستىككە نەگىزدەلگەن ءداستۇرلى بەلارۋس- قازاقستان دوستىق قاتىناستارى الداعى ۋاقىتتا دا ەكى ەلدىڭ يگىلىگى ءۇشىن ارتا بەرەدى دەپ سەنەمىن»، - دەلىنگەن جەدەلحاتتا.

سونداي- اق تاۋەلسىزدىك كۇنىنە وراي گرۋزيا پرەزيدەنتى سالومە زۋرابيشۆيليدەن، مولدوۆا پرەزيدەنتى يگور دودوننان، ەگيپەت اراب رەسپۋبليكاسىنىڭ پرەزيدەنتى ابدەل فاتتاح اس- سيسيدەن، ارمەنيا پرەمەر- ءمينيسترى نيكول پاشينياننان، ساۋد ارابيا كورولدىگىنىڭ تاق مۇراگەرى، مينيسترلەر كەڭەسى ءتوراعاسىنىڭ ورىنباسارى، قورعانىس ءمينيسترى مۋحامماد بەن سالمان ابدەل ازيز ءال ساۋدتان، تاتارستان پرەزيدەنتى رۋستام ميننيحانوۆتان قۇتتىقتاۋ حاتتار كەلدى.