جەكە كاسىپكەرلەر دە جاستارعا جالدامالى پاتەرلەر سالىپ بەرۋگە نيەت تانىتۋدا - التاي كولگىنوۆ

نۇر- سۇلتان. قازاقپارات - ەلوردالىق جەكە كاسىپكەرلەر دە جۇمىس ىستەيتىن جاستارعا ارنالعان جالدامالى پاتەرلەر سالۋعا نيەت تانىتىپ وتىر.

بۇل تۋرالى بۇگىن ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا نۇر- سۇلتان قالاسىنىڭ اكىمى التاي كولگىنوۆ ايتتى، دەپ حابارلايدى قازاقپارات ءتىلشىسى.

«پرەزيدەنتتىڭ تاپسىرماسىنا سايكەس، ءۇش ءىرى قالادا جۇمىس ىستەيتىن جاستارعا 1 مىڭ پاتەردەن بەرۋ تاپسىرماسى بار. سونىڭ  1050- ءىنىڭ كىلتىن تابىستادىق. بايقاۋ جاريالاعانمىزدا  6500 ادام قۇجاتىن تاپسىردى. ياعني، سۇرانىس 6 ەسە كوپ. سوندىقتان كەلەسى جىلى مۇنى جالعاستىراتىن بولامىز»، - دەدى التاي كولگىنوۆ.

ونىڭ ايتۋىنشا، ەلوردالىق جەكە كاسىپكەرلەر دە قالا اكىمدىگى جەر بەرەتىن بولسا جاستارعا جالدامالى پاتەرلەردى ءوز قاراجاتىنا سالۋعا قۇلشىنىس تانىتۋدا.

«قازىر كاسىپكەرلەر دە كەلىپ جاتىر. ولار 1 مىڭ ورىنعا  6500 ادامنىڭ ءوتىنىش بەرگەندىگىن، اكىمدىك جەرگە كومەكتەسسە ءوز ينۆەستيتسيالارىنىڭ ەسەبىنەن ءۇي سالىپ بەرە الاتىندىقتارىن ايتىپ وتىر. بۇل ءبىزدى قۋانتادى، قولدايمىز. ءبىراق، بيۋدجەتتەن دە توقتاتپايمىز. ياعني، جىل سايىن وسىنشا پاتەر سالۋ جوسپاردا بار. ءبىراق، ءتۇسىنۋ كەرەك، ول ءبىر جىلدا شەشىلمەيدى. بىزدە 29 جاسقا دەيىنگى جاستار سانى رەسمي تۇردە 245 مىڭ ادامدى قۇرايدى. ءبىراق ولاردىڭ ءبارىن پاتەرسىز دەپ ايتۋعا بولمايدى. دەگەنمەن، بۇل ماسەلە باقىلاۋدا. اسىرەسە، جاستارعا مۇمكىنشىلىك اشۋ كەرەك»، - دەدى ەلوردا اكىمى.

اۆتور مارلان جيەمباي