نۇر- سۇلتان قالاسىنىڭ مەترو جوباسىنىڭ «استانا بانكىندە» قالىپ قويعان قاراجاتى قاشان قايتارىلادى
بۇل تۋرالى بۇگىن ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا نۇر- سۇلتان قالاسىنىڭ اكىمى التاي كولگىنوۆ ايتتى، دەپ حابارلايدى قازاقپارات ءتىلشىسى.
«استانا» بانكىنەن قاراجاتتى قايتارۋ ماسەلەسى بويىنشا جۇمىس جۇرگىزىلىپ جاتىر. ءبىراق، بۇل ءبىر كۇندىك شارۋا ەمەس. وندا جەر ۋچاسكەسى، عيمارات، كولىكتەر بار. جالپى، جىل قورىتىندىسىندا ءبىز بۇل ءىستىڭ ناتيجەسىن ايتامىز. بۇل دۇنيە- مۇلىكتىڭ بارلىعىن سوت ارقىلى تاركىلەپ، ساتۋ قاجەت. بۇل ماسەلە ءبىزدىڭ باقىلاۋىمىزدا تۇر»، - دەدى ەلوردا اكىمى ب ا ق وكىلدەرىنىڭ ساۋالىنا وراي.
سونىمەن قاتار ول LRT جوباسى اياقتالعاننان كەيىن جولاقى قانداي بولۋى مۇمكىن ەكەنىن ايتتى.
«بۇكىل الەمدە قوعامدىق كولىك سۋبسيديالانادى. بيلەت قۇنى قانشا بولاتىنىنا قاتىستى ازىرشە ەسەپتەۋ جۇرگىزىلگەن جوق. سالىپ بىتكەننەن كەيىن بارلىق ەسەپ تۇسىنىكتى بولادى»، - دەدى التاي كولگىنوۆ.
بۇعان دەيىن نۇر- سۇلتان قالاسىنىڭ اكىمى LRT قۇرىلىسىن وڭتايلاۋدىڭ ناتيجەسىندە شامامەن 1,2 ميلليارد دوللار قاراجات ۇنەمدەلگەنىن ايتقان بولاتىن.
اۆتور مارلان جيەمباي
