دوپينگپەن ۇستالعان سپورتشىلارعا جازانى كۇشەيتەتىن زاڭ كۇشىنە ەنەدى

نۇر-سۇلتان. قازاقپارات - پرەزيدەنت قاسىم-جومارت توقايەۆ «ق ر سپورت جانە دەنە شىنىقتىرۋ تۋرالى كەيبىر زاڭنامالىق اكتىلەرگە وزگەرتۋلەر مەن تولىقتىرۋلار ەنگىزۋ تۋرالى» زاڭ جوباسىنا قول قويدى، دەپ حابارلايدى قازاقپارات ءتىلشىسى دەنە شىنىقتىرۋ جانە سپورت كوميتەتىنە سىلتەمە جاساپ.

زاڭ جوباسى دوپينگكە قارسى ەرەجەلەردى بۇزعانداردىڭ جاۋاپكەرشىلىگىن قاتاڭداتۋعا، ۇلتتىق دوپينگكە قارسى ۇيىمنىڭ مارتەبەسىن كۇشەيتۋگە باعىتتالعان.

«قولدانىستاعى زاڭناماعا دوپينگكە قارسى ەرەجەلەردى بۇزعانى ءۇشىن جاۋاپكەرشىلىكتى قاتاڭداتۋ بويىنشا وزگەرىستەر مەن تولىقتىرۋلار ەنگىزۋ، اتاپ ايتقاندا سپورتشىعا دوپينگ تاعايىنداعان ادامدارعا قاتىستى اكىمشىلىك جاۋاپكەرشىلىكتى ەنگىزۋ قاجەتتىلىگى تۋىندادى. ول 200 ايلىق ەسەپتىك كورسەتكىش مولشەرىندە ايىپپۇل تۇرىندە جازانى كوزدەيدى»، - دەلىنگەن كوميتەتتىڭ حابارلاماسىندا.

سونىمەن قاتار، دوپينگتى پايدالانعانى ءۇشىن زاڭ جوباسىندا:

- ديسكۆاليفيكاتسيا؛

- سپورتشىنىڭ سپورتتاعى ناتيجەسىن جويۋ جانە بىلىكتىلىك ۇپايلارىن نەمەسە بالدارىن الىپ تاستاۋ؛

- اقشالاي كوتەرمەلەۋدى قايتارۋ؛

- سپورتشىلار مەن جاتتىقتىرۋشىلارعا ءومىر بويى اي سايىنعى ماتەريالدىق قامسىزداندىرۋدى تولەۋدى توقتاتۋ؛

- سپورتشىلارعا، جاتتىقتىرۋشىلارعا جانە كلۋب كوماندالارىنىڭ باسشىلارىنا اي سايىنعى اقشالاي قامتۋدى توقتاتۋ؛

- سپورتتىق اتاعىنان ايىرۋ؛

- وليمپيادا، پاراليمپيادا جانە سۋردليمپيادا ويىندارىنىڭ چەمپيونى جانە جۇلدەگەرى تۇرعىن ءۇيدى پايدالانۋ شارتىن بۇزۋ؛

- سپورت تۇرلەرى بويىنشا قازاقستان رەسپۋبليكاسىنىڭ قۇراما جانە شتاتتىق قۇراما كوماندالارىنىڭ قۇرامىنان سپورتشىلاردى، جاتتىقتىرۋشىلاردى شىعارۋ جازالارى قاراستىرىلعان.

سونداي-اق، زاڭ جوباسىندا وليمپيادا، پاراليمپيادا جانە سۋردليمپيادا چەمپيوندارى مەن جۇلدەگەرلەرىنە 10 جىل مەرزىمگە جالعا باسپانا بەرۋ، سونداي-اق دوپينگ-تەستىلەردى ساقتاۋ مەرزىمى 10 جىل بولۋىنا بايلانىستى وسى مەرزىمگە اتالعان تۇرعىن ءۇيدى يەلىكتەن شىعارۋعا تىيىم سالۋ كوزدەلگەن. ەگەر وسى كەزەڭدە سىنامالاردا دوپينگ انىقتالماسا، تۇرعىن ءۇي سپورتشىنىڭ مەنشىگىنە بەرىلەدى.