ورالدا «التىن دومبىرا» يەگەرى انىقتالدى
بەلگىلى اقىن، حالىقارالىق ايتىس اقىندارى مەن جىرشى-تەرمەشىلەر وداعىنىڭ باسقارما ءتوراعاسى ءجۇرسىن ەرمان جۇرگىزگەن دودانىڭ فينالىندا ون اقىن ونەر كورسەتتى.
ساحناعا ءبىرىنشى بولىپ شىققان قاراعاندىلىق ءومىرجان كوپبوسىنوۆ الماتىلىق قانات مىرزاحاننان باسىم ءتۇستى.
باتىس قازاقستاندىق جانسايا مۋسينا ءتۇبى سەمەيلىك، قازىر الماتىدا تۇراتىن رۇستەم قايىرتايعا جول بەردى.
تاعى ءبىر الماتىلىق قازىرەت بەردىحان قارسىلاسى، پاۆلودارلىق اسپانبەك شۇعاتايەۆتان گورى جوعارى بال الدى.
«التىن دومبىرانىڭ» ەكى مارتە يەگەرى، قىزىلوردالىق مۇحتار نيازوۆ باتىس قازاقستاندىق باۋىرجان شيرمەدين ۇلىنىڭ الدىن وراپ كەتتى.
ايتىستىڭ اقتاڭگەرى، ارقالىق قالاسىنىڭ وكىلى ايبەك قاليەۆ نۇرسۇلتاندىق اسەم ەرەجە قىزىن جەڭدى.
وسى توپتىڭ ورتاسىنان سۋىرىلىپ، العا شىققان مۇحتار نيازوۆ پەن رۇستەم قايىرتاي سۋپەرفينالدا كۇش سىناستى. قوس قۇرداس ەلدىك پەن دوستىقتىڭ تۋىن جوعارى كوتەرە ءبىلدى.
قازىلار القاسىنىڭ شەشىمىمەن «التىن دومبىرامەن» بىرگە باس جۇلدە (4 ميلليون تەڭگە) رۇستەم قايىرتايعا بەرىلدى.
مۇحتار نيازوۆ ءبىرىنشى جۇلدەگە (2 ميلليون تەڭگە) قوسا «ايتىستىڭ اقتاڭگەرى» اتاعىنا يە بولدى.
جانسايا مۋسينا مەن قازىرەت بەردىحان ەكىنشى (1 ميلليون تەڭگەدەن)، ايبەك قاليەۆ پەن ءومىرجان كوپبوسىنوۆ ءۇشىنشى (700 مىڭ تەڭگەدەن) ورىنعا كوتەرىلسە، اسپانبەك شۇعاتايەۆ، اسەم ەرەجە قىزى، قانات مىرزاحانعا ارنايى جۇلدە (350 مىڭ تەڭگەدەن) بەرىلدى.
ايتىس مەتسەناتى دۋلات تاستەكەيەۆ بەلگىلەگەن ءبىر جىلدىق ستيپەنديا (2,4 ميلليون تەڭگە) باۋىرجان شيرمەدين ۇلىنا بۇيىردى. سونداي-اق كاسىپكەر قاراعاندىلىق ديدار قاميەۆكە ات مىنگىزدى. باسقا قاتىسۋشىلار شابىتتاندىرۋ سىيلىقتارىمەن قايتتى.
جۇلدەلەردى ق ر مادەنيەت جانە سپورت ۆيتسە-ءمينيسترى نۇرعيسا داۋەشوۆ، «نۇر وتان» پارتياسىنىڭ حاتشىسى عابيدوللا وسپانقۇلوۆ، باتىس قازاقستان وبلىسىنىڭ اكىمى عالي ەسقاليەۆ جانە اقىن، مەملەكەتتىك سىيلىقتىڭ يەگەرى نەسىپبەك ايت ۇلى ءتوراعالىق ەتكەن قازىلار القاسى تاپسىردى.
ەسكە سالا كەتەيىك، بۇدان بۇرىن «التىن دومبىرا» ايتىسىندا فينالعا شىققاندار بەلگىلى بولعانىن جازعان ەدىك.
