اسحات ايماعامبەتوۆ: تاۋەلسىزدىگىمىزدى باياندى ەتۋ - ءبىلىمدى دە بىلىكتى ۇرپاقتىڭ قولىندا

«دوستار! قازاقستان رەسپۋبليكاسىنىڭ تاۋەلسىزدىك كۇنى قۇتتى بولسىن! تاۋەلسىزدىكتىڭ تاڭى اتقانىنا 28 جىل تولىپ وتىر. تاڭداپ العان جولىمىز بىزگە بولاشاققا سەنىممەن قاراۋعا مۇمكىندىك بەرەدى. ءبىزدىڭ ورتاق ماقساتىمىز - تاۋەلسىزدىك جىلدارى قول جەتكىزگەن جەتىستىكتەرىمىزدى ساقتاۋ جانە ەسەلەي ءتۇسۋ»، - دەپ جازدى مينيستر Facebook-تەگى پاراقشاسىندا.

ءمينيستردىڭ جازۋىنشا، تاۋەلسىزدىك جىلدارىندا ەلىمىزدىڭ ءبىلىم بەرۋ سالاسىندا دا جەتكەن جەتىستىكتەرى از ەمەس.

«وسى رەتتە، تاۋەلسىزدىگىمىزدى باياندى ەتۋ - ءبىلىمدى دە بىلىكتى بولاشاق ۇرپاقتىڭ قولىندا ەكەندىگىن ايتا كەتكەن ءجون. ويتكەنى مەملەكەتتىڭ ءار قادامى ناتيجەلى بولۋى ءۇشىن تۇلعانىڭ باسەكەگە قابىلەتتىلىگى دە جوعارى بولۋى كەرەك. مەرەكە كۇنى سىزدەرگە مىقتى دەنساۋلىق، وتباسىلارىڭىزعا بەرەكە جانە وتانىمىزدىڭ گۇلدەنۋىن تىلەيمىن!» - دەدى مينيستر.

ايتا كەتسەك، بيىل قازاقستان رەسپۋبليكاسىنىڭ تاۋەلسىز ەل اتانعانىنا 28 جىل تولىپ وتىر.