ديماش قۇدايبەرگەن بيبىگۇل تولەگەنوۆانى مەرەيتويىمەن قۇتتىقتادى

الماتى. قازاقپارات - تانىمال ءانشى ديماش قۇدايبەرگەن قازاقتىڭ بۇلبۇلى بيبىگۇل تولەگەنوۆانى 90 جىلدىق مەرەيتويىمەن قۇتتىقتادى، دەپ حابارلايدى قازاقپارات ءتىلشىسى.

«اسا قۇرمەتتى بيبىگۇل احمەت قىزى تولەگەنوۆا! ءسىزدى وسىناۋ 90 جىلدىق مەرەيتويىڭىزبەن قۇتتىقتايمىن! ءالى ەسىمدە 2015-جىلى «سلاۆيان بازارىنا» بارعالى جاتقاندا انالىق اق باتاڭىزدى بەرىپ تىلەۋىمدى تىلەدىڭىز. قىتاي ەلىندە دە جارىستا جۇرگەن كەزىمدە جولداعان باتاڭىز ءالى ەسىمدە. قازاق ءان ونەرىنىڭ - اناسى ەكەنىڭىز ءسوزسىز. بيبىگۇل اپا، سىزگە، مىقتى دەنساۋلىق، ۇزاق عۇمىر، 100 جىلدىعىڭىزدى دۇركىرەتىپ اتاپ وتەيىك! ءسىزدىڭ كۇش جىگەرىڭىز، ەڭبەك ەتكەن جولدارىڭىز بارلىعى بىزگە بولاشاققا اپارار ۇلكەن بەلەس»، - دەپ جازدى ديماش قۇدايبەرگەن Instagram-داعى پاراقشاسىندا.

بۇعان دەيىن، ءانشى قازاقستاندىقتاردى تاۋەلسىزدىك كۇنىمەن قۇتتىقتاعان بولاتىن.