07:32, 18 - جەلتوقسان 2019 | GMT +5
ەلوردادا ورالحان بوكەيدىڭ «قار قىزى» ساحنالانادى
نۇر-سۇلتان. قازاقپارات - ەلوردادا «جاستار تەاترى» 18-19-جەلتوقسان كۇندەرى جازۋشى و. بوكەيدىڭ «قار قىزى» دراماسىنىڭ پرەمەراسىن كورەرمەن نازارىنا ۇسىنادى، دەپ حابارلايدى قازاقپارات ەلوردا ينفوعا سىلتەمە جاساپ.
قازاقستاننىڭ ەڭبەك سىڭىرگەن قايراتكەرى، رەجيسسەر - نۇرقانات جاقىپبايدىڭ ساحنالاۋىنداعى بۇل قويىلىم وزىندىك رەڭى، ەرەكشە قولتاڭباسى، جاڭاشا كوزقاراسى ارقىلى شەشىم تاپپاق.
«قازاق ادەبيەتىنىڭ كەربۇعىسى ورالحان بوكەيدىڭ «قار قىزى» پوۆەسىن وقىماعان ادام كەمدە- كەم شىعار. قىس ورتاسىندا مال ازىعى تاۋسىلىپ شاراسىز كۇن كەشكەن اۋىلدىڭ ءۇش ازاماتى اق قار، كوك مۇزدا ءشوپ اكەلۋگە جولعا شىعادى. قارى قالىڭ التايدىڭ جون تاۋلارىندا توڭىپ، ءۇسىپ ولۋگە شاق قالعان جولاۋشىلاردىڭ ءومىر ءۇشىن ارپالىسى، سىناق ساعاتىنداعى پەندەشىلىك پەن جان پيدالىق ارەكەتى كورەرمەن قاۋىمنىڭ كوكىرەگىنە جول سالماق»، دەلىنگەن حابارلامادا.
جاستار جىلىندا نۇر-سۇلتان قالالىق جاستار تەاترىنىڭ رەپەرتۋار قورجىنى حالىق ىزدەپ كورەتىن، اڭساپ كەلەتىن جاڭا وتاندىق جاڭا درامامەن تولىستى.
