ەلوردالىق ارۋلار بالالارعا ەرەكشە كوڭىل-كۇي سىيلادى
بۇل جونىندە بايقاۋدىڭ باسپا ءسوز قىزمەتىنە سىلتەمە جاساپ قازاقپارات حابارلايدى.
مەملەكەتتىڭ، بيزنەس پەن قوعامنىڭ الەۋمەتتىك سەرىكتەستىگى ەلدىڭ تۇراقتى دامۋىنا جانە الەمدەگى باسەكەگە قابىلەتتى وتىز ەلدىڭ قاتارىنا قوسىلۋ ءۇشىن اسا ماڭىزدى ەكەنى انىق. بۇنىڭ بارلىعى ءار ازاماتتىڭ جەكە الەۋمەتتىك جاۋاپكەرشىلىگىنەن باستالادى. ال استانالىق جيىرما ارۋدىڭ الەۋمەتتىك باستاماسى وزگەلەرگە ەرەكشە موتيۆاتسيا مەن ونەگە دەپ ايتۋعا ابدەن بولادى.
«جاقسىلىق جاساۋدى قازىر باستا» پرينتسيپىن نەگىزگە الا وتىرىپ، بايقاۋعا قاتىسۋشى ارۋلار ءوز ارەكەتتەرىمەن «قايىرىمدىلىق جاساۋ ءۇشىن قارجىنىڭ بولۋى شارت ەمەس» ەكەنىن دالەلدەپ كەلەدى. كەيدە مۇقتاج جاندارعا قول ۇشىن سوزۋ ءۇشىن جەكە رەسۋرستار دا جەتكىلىكتى.
ماسەلەن، دەمالىس كۇندەرى كونكۋرسقا قاتىسۋشىلار ەلورداداعى «SOS بالالار اۋىلى» تاربيەلەنۋشىلەرىن «مۇزدى ولكە-2» مۋلتيپليكاتسيالىق فيلمىن تاماشالاۋعا Kinopark كينوتەاترىنا شاقىردى. اننا جانە ەلزا حانشايىمدار مەن ولاردىڭ دوستارى باستان كەشىرگەن قىزىققا تولى وقيعالار جايلى ەرتەگى بالالاردى كەرەمەت كوڭىل-كۇيگە بولەدى.
«بۇل - مەنىڭ سۇيىكتى مۋلتفيلمىم. ەكىنشى ءبولىمىن اسىعا كۇتكەن ەدىم. كەيىپكەرلەردىڭ بارلىعى ۇنايدى، اسىرەسە، ەلزا! سەبەبى وتە ادەمى. بۇگىن قىزداردىڭ ءتاجىن قولىما ۇستاپ، ءوزىمدى حانشايىم سەزىندىم»، - دەپ كىشكەنتاي قاراقات ءوز ەموتسياسىن ءبولىستى.
كەلەسى كۇنى ارۋلار نۇر-سۇلتان قالاسىنداعى «2№ ارنايى مەكتەبىنە» بارىپ، تاربيەلەنۋشىلەر ءۇشىن وزىندىك ارت-تەراپيا ۇيىمداستىردى. قىزدار ءوز قارجىسىنا قاجەتتى قۇرالداردى ساتىپ الىپ، وقۋشىلارمەن بىرگە جاڭا جىلدىق اشىق حاتتاردى دايىندادى.
«بالالار مەنى شابىتتاندىردى. ولار - دارىندى، ونەرلى ءارى سونداي اقجارقىن. ولار مەنى قانشالىقتى تولعاندىرعانىن سوزبەن ايتىپ جەتكىزە المايمىن»، - دەيدى «استانا ارۋى» بايقاۋىنىڭ قاتىسۋشىسى ايزادا حابيبوللايەۆا.
بىرلەسكەن ارت-تەراپيا جاڭا تالانتتاردى اشىپ قانا قويماي، بالالاردىڭ كوكجيەگىن كەڭىتىپ، مەرەكە الدىندا ەرەكشە كوڭىل-كۇي سىيلادى. بۇل - جاقسى ءىس جاساۋ ءۇشىن قوماقتى قارجى ەمەس، جەكە ۋاقىت پەن كوڭىل ءبولۋدىڭ جەتكىلىكتى ەكەنىن اڭعارتادى.
بايقاۋعا قاتىسۋشىلار «زامانداس» وتباسىلىق اۋلا كلۋبىنىڭ بوبەكتەرىنە دە جاڭا جىلدىق كوڭىل كۇي سىيلادى.
«ءبىز بالالارمەن بىرگە ادەمى جاڭا جىلدىق ويىنشىقتار جاسادىق. ال سوڭىندا بىرلەسىپ ۇلكەن شىرشانى بەزەندىردىك. بالالار ءۇشىن بۇل ناعىز مەرەكە بولدى، ال ءبىز قىزدارمەن وسى ءىس ارقىلى شەكسىز پوزيتيۆ پەن كەرەمەت ەنەرگيا الدىق»، - دەيدى سايىسقا قاتىسۋشىسى نارگيس شونيزوروۆا.
قايىرىمدىلىق اكسيالارىنىڭ كەلەسى كەزەڭى «28 پەتەل» قوعامدىق قورىنا پراكتيكالىق كومەك كورسەتۋ بولدى. قور سالماعى نەبارى 500 گرام بولىپ شالا تۋعان سابيلەرگە قولداۋ كورسەتەدى. بۇنداي جاعدايدا امان قالۋ وتە قيىن، سابيگە شىن مانىندە جىلۋ قاجەت.
«ارنايى ينكۋباتوردا ەرتە تۋعان سابيلەر اۆتوماتتى كيسلورودپەن قامتاماسىز ەتىلەدى. دەگەنمەن جىلۋ الماسۋ دۇرىس بولماعاندىقتان، كەشەندى مەديتسينالىق شارالارمەن قاتار، سابيلەرگە جان جىلۋى قاجەت، - دەيدى قازاقستاندىق قوردىڭ نەگىزىن قالاۋشى كارلا نۇر. — ءبىزدىڭ ەرىكتىلەر ەرتە تۋعان سابيلەرگە كيىم- كەشەكتەردى ارنايى تازا جۇننەن توقىپ، سابيلەرگە جىلۋ مەن وزدىگىنەن دەم الۋعا مۇمكىندىك بەرەدى. جىلۋدان بولەك، ءجۇن تالشىقتارى تەرىگە جاعىمدى اسەر ەتىپ، وزىندىك ماسساج جاساعانداي قوزعالىس موتوريكاسىن جەتىلدىرەدى».
«سەنىڭ قولىڭدا الاقانداي ءسابيدىڭ تاعدىرى بار ەكەنىن ءبىلۋ - ۇلكەن جاۋاپكەرشىلىك» - دەگەن «استانا ارۋى» بايقاۋىنىڭ قاتىسۋشىسى ايىم يماشيەۆا كوز جاسىن جاسىرا المادى. - مەن مۇندا ءوز قولىممەن كيىم-كەشەك توقۋ ءۇشىن قاجەتتىنىڭ ءبارىن الىپ كەلدىم. سابيلەردى كورگەن كەزدە ەرەكشە تولقىپ، ءتىپتى قولدارىم دىرىلدەدى. باستىسى، شۇلىقتى ۇلكەن ماحابباتپەن توقىدىم».
العاش قۇرىلعالى بەرى «28 پەتەل» قوعامدىق قورى توعىز ەلدە ءوز فيليالىن اشتى. ولار: قازاقستان (18 قالادا)، وزبەكستان، لاتۆيا، رەسەي، قىرعىزستان، ۋكراينا، ازەربايجان، گرۋزيا جانە بەلارۋس. جەتى جىلدىڭ ىشىندە وسى ەلدەردىڭ انا مەن بالا ورتالىقتارىنا 134673 ءسابي كيىمى جەتكىزىلگەن.
«استانا ارۋى» قاتىسۋشىلارى ءۇشىن قالالىق قان ورتالىعىنا بارۋ - ماڭىزدى تاجىربيە بولدى. قىزدار ەرىكتى دونور اتانباس بۇرىن، سالماق، قانداعى گەموگلوبين مولشەرى جانە باسقا دا ومىرلىك ماڭىزدى كورسەتكىشكەر تولىق ەسكەرىلەتىن مەديتسينالىق تەكسەرىستەن ءوتتى. دارىگەرلەرىنىڭ سوزىنشە، ورتالىققا قان كۇندەلىكتى قاجەت جانە ارۋلار ەرىكتى دونور اتانۋ ارقىلى وزگەلەرگە ۇلگى بولدى. مۇمكىن، ناقتى ءسىز تاپسىرعان قان ەرتەڭ بىرەۋدىڭ ءومىرىن قۇتقارۋعا سەپ بولادى.
كىشىگىرىم يگى ىستەردىڭ قاتارى ارتاتىنى ءسوزسىز. سەبەبى «استانا ارۋى» ۇيىمداستىرۋ كوميتەتى قازىرگى ۋاقىتتا ب ۇ ۇ (يۋنيسەف) بالالار قورىمەن بىرلەسىپ #ItsAllAboutAbility (بارلىعى دا مۇمكىندىكتەرگە بايلانىستى) اتتى ەرەكشە قاجەتتىلىكتەرى بار بۇلدىرشىندەردى قولداۋعا ارنالعان اقپاراتتىق كامپانياسىن جۇزەگە اسىرۋعا اتسالىسىپ جاتقان «Samruk-Kazyna Trust» الەۋمەتتىك جوبالاردى دامىتۋ قورىمەن ىنتىماقتاستىق ورناتتى. بۇل باستامانىڭ ماقساتى - بالالار قۇىعىن قورعاۋ، ولار ءۇشىن سپورتپەن اينالىسۋ مۇمكىندىكتەرىن جاساۋ ماسەلەلەرىنە قوعامنىڭ نازارىن اۋدارۋ.
#ItsAllAboutAbility اتتى ەرەكشە قاجەتتىلىكتەرى بار بالالاردى قورعاۋعا ارنالعان اقپاراتتىق كامپانيا قازاقستاندا 2019-جىلدىڭ 8- قازان كۇنى باستالدى. جوبانى ءتۇرلى باعىتتاردا قىزمەت اتقاراتىن مەكەمەلەر قولدايدى.
#ItsAllAboutAbility كامپانياسىنا كەز كەلگەن مەكەمە نەمەسە قاراپايىم بەلسەندى ازامات قوسىلا الادى. قوسىمشا ۆيزۋالدى اقپارات (لوگوتيپتەر، شريفتەر) الۋ ءۇشىن «Samruk-Kazyna Trust» قورىنا حابارلاسۋعا بولادى.
ەستەرىڭىزگە سالا كەتەيىك، «استانا ارۋى 2020» كونكۋرسىنىڭ فينالى 18 جەلتوقسان كۇنى قازمەديا ورتالىعىندا وتەدى.
