يران ءوز تاريحىندا تۇڭعىش رەت قازاق كۇرەسىنەن جۇلدەگەر اتاندى
«100 كەلىگە دەيىنگى سالماقتا ونەر كورسەتكەن يراندىق سپورتشى يازدان-پاناح جارتىلاي فينالدا قازاقستاندىق قارسىلاسىنا ەسە جىبەرىپ، قولا مەدال جەڭىپ الدى. وسىلايشا ول يران تاريحىندا ءبىرىنشى بولىپ قازاق كۇرەسىنەن جۇلدەگەر اتاندى.
15- جەلتوقساندا قازاقستاندا قازاق كۇرەسىنەن الەم چەمپيوناتى باستالعان بولاتىن. اقتوبە قالاسىندا ءوتىپ جاتقان الەم چەمپيوناتىنا 40 تان اسا ەلدىڭ سپورتشىلارى قاتىسۋدا. ولاردىڭ قاتارىندا ۋكراينا، گرۋزيا، اۋستريا، نورۆەگيا، ەستونيا، فرانسيا، يرلانديا، گەرمانيا، پاكىستان، وزبەكستان، يران، ۇلى بريتانيا، قىرعىزستان، ءۇندىستان، ليتۆا، سلوۆەنيا، رەسەي جانە باسقالار بار.
Qazaq Kuresi — سپورتتىڭ ەڭ ەجەلگى تۇرلەرىنىڭ ءبىرى. ول بۇگىندە تەك قازاقستان عانا ەمەس، باسقا دا ەلدەردە تانىمال. 2016-جىلى UNESCO قازاق كۇرەسىن ادامزاتتىڭ ماتەريالدىق ەمەس مادەني مۇرالارىنىڭ قاتارىنا ەنگىزدى»، - دەپ جازادى يرنا.
ەسكە سالا كەتەيىك، كەشە اقتوبە قالاسىندا تاۋەلسىزدىك كۇنىنە وراي ۇيىمداستىرىلعان قازاق كۇرەسىنەن الەم چەمپيوناتى باستالدى. جەكسەنبى - جارىستىڭ ءبىرىنشى كۇنىندە 55، 60، 90، 100 جانە 100 كەلىدەن جوعارى سالماق بويىنشا جەڭىمپازدار انىقتالدى. اقتىق سىنعا قازاقستاندىق ءۇش بالۋان شىقتى. ولاردىڭ قاتارىندا داۋلەت نيەتباي (55 كەلى)، نۇرىم سالىمگەرەيەۆ (100 كەلى) جانە رۋسلان ءابدىرازاقوۆ (100 كەلىدەن جوعارى) بار. ءۇش سپورتشىمىز دا «التىننان» القا تاقتى.
Qazaq Kuresi حالىقارالىق فەدەراتسياسى ۇيىمداستىرعان چەمپيوناتتار تاريحىندا العاش رەت تورەشىلەر قۇرامىنا قىرعىزستاننان كەلگەن ايەل تورەشى قوسىلدى. جارىستىڭ باس تورەشىسى - قازاقستان رەسپۋبليكاسىنىڭ حالىقارالىق دارەجەدەگى سپورت شەبەرى، قازاقستان رەسپۋبليكاسىنىڭ ەڭبەك سىڭىرگەن باپكەرى، PhD دوكتور ەربول مىرزابوسىنوۆ.
Qazaq Kuresi حالىقارالىق فەدەراتسياسى سپورتشىلاردى التىن، كۇمىس، قولا مەدالدان بولەك، ۇزدىك تەحنيكا، ادەمى لاقتىرۋ جانە 2019-جىلعى الەم چەمپيوناتىندا جەڭىسكە جەتۋ نيەتى ءۇشىن دە ماراپاتتايدى.
