يلفا ءىلياس قىزى جانسۇگىروۆانىڭ ءبىلال سۇلەيەۆ تۋرالى ەستەلىگىنەن

نۇر-سۇلتان قازاقپارات - قازاقتىڭ ارىس ازاماتى ءىلياس جانسۇگىروۆتىڭ قىزى يلفا جانسۇگىروۆا اناسىنىڭ العاشقى جارى بولعان ءبىلال سۇلەيەۆتىڭ تاسادا قالىپ جاتقانىنا، بۇگىنگى ۇرپاقتىڭ ول جايىندا بىلمەيتىنىنە قاتتى قىنجىلادى.

قيىن- قىستاۋ، زوبالاڭ جىلدارى عۇمىر كەشكەن ۇرپاقتىڭ باۋىرماشىلدىعى ەرەكشە بولا ما دەيمىن. يلفا جانسۇگىروۆا: «بۇل كىسىنىڭ ءومىر جولىن زەرتتەيتىن ۇرپاق تابىلسا جاقسى بولار ەدى. مەن اكەم مەن شەشەمنىڭ مۇرالارىن جيناقتايمىن دەپ، سۇلەيەۆكە كوڭىل بولە المادىم. كەزىندە تەمىربەك جۇرگەنوۆتەرمەن تەڭ قىزمەت ەتسە دە، مۇقىم حالىققا اتى بەيتانىس. ول «الاشورداشىلاردىڭ» ءبىرى بولعان. ومبىدا، قازاندا، ماسكەۋدە ءبىلىم العان. «قازاق» گازەتىنە ماقالالار دا جازعان»، - دەپ مۇڭىن شاققان ەكەن.

مەن دە قولىمنان كەلگەنشە جاس ۇرپاقتىڭ ولاردى تانۋىنا از دا بولسا ۇلەسىمدى قوسقىم كەلەدى. ءبىراق، كەيبىر وقىرماندارىم بۇل تاعدىرلى وتباسى جايلى جازعانىمدى قالامايدى. بالكىم، اناسى فاتيمانىڭ ءۇش ارىستاي تۇلعامىزعا تۇرمىسقا شىققانىن ۇناتپايدى نەمەسە ۇلتى تاتار بولعانى ءۇشىن جاقتىرمايدى. ايتپاقشى، الماتى وبلىسىندا فاتيما عابيتوۆانىڭ تۇرعان ءۇيى ساقتالىپتى. ابدەن قيراۋعا شاق قالعان دەيدى كورگەندەر. سول ءۇيدى كورۋ - ءبىر ارمانىم.

جوعارىداعى سۋرەتتەگى كىشكەنتاي بالا - ءبىلال مەن فاتيمانىڭ ۇلى جانىبەك. قاسىندا فاتيمانىڭ اپكەسى ءمارزيا عابيتوۆا. جانىبەك سۇلەيەۆ 1923 -جىلى دۇنيەگە كەلگەن. 1941 -جىلى سوعىسقا اتتانىپ، 1943 -جىلى 19 جاسىندا اۋىر جاراقاتتان قازا تاۋىپتى. قاتال تاعدىر، سۇرەڭسىز ءومىر، ايانىشتى ءولىم. سول ۋاقىتتا بەس بالاسىن قۇشاقتاپ، زار جىلاپ اناسى قالعان ەدى.

«جانىبەك جارالانىپ، سمولەنسكىدە گوسپيتالدا كوز جۇمىپتى. سوندا كوپپەن بىرگە ءبىر مولاعا جەرلەنىپتى. انام ءومىر بويى جانىبەكتىڭ باسىنا ءبىر ۋىس توپىراق سالسام دەپ ارمانداپ ءوتتى»، - دەيدى اسىلدىڭ ۇرپاعى يلفا اپامىز.