جاپپاي ساتىلىمنىڭ سىرى نەدە؟
جارناما جاسالىپ، حالىققا ارزان باعامەن زات الىپ ۇلگەرۋگە ۇگىت- ناسيحات جۇرگىزەدى. كەيبىر ادامدار ارنايى جەڭىلدىكتەر مەرزىمىن كۇتىپ، الدىن الا جوسپارلاپ جاتادى. جاپپاي ساتىلىم ناۋقانىنىڭ جارناماسى ادام كوزى تۇسەتىن بارلىق ءىلىنىپ، تەلەديدار نە ينتەرنەتتەن كورسەتىلەدى. مۇنىڭ ءبارى ادامعا قالاي اسەر ەتەدى؟ كاسىپكەرلەر قالايشا ساتىپ الۋشىلاردى تارتادى؟ ءبارىمىز مەرەكە جاقىنداعان ساتتە جاقىن ادامدارىمىزعا سىيلىق بەرۋدى ويلايمىز نە جاڭا كيىم- كەشەك الۋدى جوسپارلايمىز. قاجەتتى تەحنيكالاردى ساتىپ الۋدى، ەسكىرگەن تەلەفونىمىزدى جاڭارتۋدى ويلايمىز. وسىنداي ساتتە جەڭىلدىكتەردىڭ جارناماسىن كوزىمىز شالىپ، قۇلاعىمىز ەستىپ جاتادى. قانشا ءمان بەرمەۋگە تىرىسساق تا كەز كەلگەن ساتتە الدىمىزدان شىعا كەلەدى. ال ءبىزدىڭ ميىمىز قاجەتتى اقپاراتتان گورى وسىنداي جەڭىل جارنامانى ەستە ساقتاۋعا جاقسى داعدىلانعان.
كەز كەلگەن ادام سىيلىق العاندى ۇناتادى. ال سىيلىق العان ادامنىڭ ميى قۋانىش سەزىمىن وياتىپ، جاقسى كوڭىل- كۇي بەرەدى. زاتتى جەڭىلدىكپەن العان كەزدە ادام ءدال وسىنداي سەزىمدە بولادى. قۋانىش سەزىمى از عانا ۋاقىت بولعانىمەن ساتىپ الاتىن كەزدە ادامنىڭ ميى جەڭىلدىكتەن باسقا اقپاراتتى قابىلداعىسى كەلمەيدى. دۇكەندەر بولسا ساتىپ الۋشىلاردى قىزىل بەلگىلەرمەن، ءتۇرلى ماڭدايشا جازۋلارمەن، ادەمى ساندارمەن قىزىقتىرادى. ءبىر قىزىعى ادامدار قاراپايىم باعا كورسەتكىشى جازىلعان تاۋارعا قاراعاندا ءتۇرلى تۇسپەن بويالعان، اسىرەسە قىزىلمەن جازىلعان تاۋارلاردى ءجيى ساتىپ الادى ەكەن. وسى قاعيدا بويىنشا دۇكەندەرگە تاۋاردىڭ باعاسىن 10,000 تەڭگەنىڭ ورنىنا 9,990 دەپ كورسەتكەلگەن ءتيىمدى. ويتكەنى مي 9,990 دەگەن ساندى 10 مىڭنان الدەقايدا از جانە جەڭىلدىك دەپ قابىلدايدى. ال ناۋقاننىڭ ۋاقىتى از، تاۋار سانى شەكتەۋلى دەگەن ءماتىندى وقىعاندا ادام تەز شەشىم قابىلداۋعا تىرىسادى.
دۇكەندەر جاقسى اتموسفەرا جاساۋدان بولەك كوڭىل- كۇيگە جايلىلىق سىيلايتىن اۋەندەردى قوسىپ قويادى. بۇل ادامدارعا جاقسى اسەر ەتىپ، الاڭسىز تاۋار الۋ سەزىمىن تۋدىرادى. بۇدان بولەك بۇكىل الەمدە كەڭىنەن تارالعان «قارا جۇمانى» ساتىپ الۋشىلار جاپپاي ساتىلىم مەن جەڭىلدىكتەر ۋاقىتىمەن بايلانىستىرىپ، الدىن الا دايىندالۋعا ماجبۇرلەيدى.
Massaget.kz
