وسكەمەندە ۇلتتىق تاعامدار ازىرلەۋدەن سايىس ءوتتى

نۇر- سۇلتان.قازاقپارات - شىعىس- قازاقستان وبلىسىنىڭ «دوستىق ءۇيى - قوعامدىق كەلىسىم ورتالىعىندا» ءارتۇرلى ۇلت وكىلدەرىنىڭ تاعامدارى تانىستىرىلدى، دەپ حابارلادى ق ح ا سايتى.

العاش رەت ۇيىمداستىرىلعان «قازاقستان حالقى اسحاناسى» سايىسىنا ەتنومادەني بىرلەستىك مۇشەلەرى ۇلتتىق تاعامدارىن ۇسىندى. ۇيىمداستىرۋشىلاردىڭ اقپاراتىنا سايكەس، ءىس- شارانىڭ باستى ماقساتى - شىعىس قازاقستان جەرىندەگى حالىقتاردىڭ اسپازدىق مادەنيەتىن ناسيحاتتاۋ.

قاتىسۋشىلار العاشقى كەزەڭدە قازىلار القاسىنا ۇلتتىق تاعامنان ءدام تاتقىزىپ، ونىڭ جاسالۋ تەحنولوگياسىن ايتىپ بەردى. ءبىر- بىرىنە ۇقسامايتىن، ءتىل ۇيىرەر تاعامدار قاتارىندا ءازىربايجانداردىڭ ۇلتتىق تاعامى - دولما، بەلورۋس اسحاناسىنان «كولدۋن» اتاۋىمەن تانىمال كوتلەتتار مەن بالىشتەر، يەۆرەيلەردىڭ «فيش» اتتى بالىعى، كورەيلەردىڭ ديەتالىق رولل تاعامدىرى بولدى، - دەلىنگەن اقپاراتتا.

كەلەسى كەزەڭدە قاتىسۋشىلاردىڭ جايعان داستارحاندارىنا، كيىم كيىسىنە نازار اۋدارىلدى. سايىس كورەرمەندەرى تاعامداردان ءدام تاتىپ، ونىڭ شىعۋ تاريحى مەن جاسالۋ جولدارىمەن تانىستى. قورىتىندىلاي كەلە، ءادىلقازى القالارى ۇلت وكىلدەرىنىڭ بارلىعى اسحانالارىن بىردەي جوعارى دەڭگەيدە تانىستىردى دەگەن باعا بەرىپ، بارلىقتارىن سىيلىقتارمەن ماراپاتتادى.