نۇر-سۇلتانداعى اۋەجايدا وق اتىلدى

نۇر-سۇلتان. قازاقپارات - ەلورداداعى «نۇرسۇلتان نازاربايەۆ» حالىقارالىق اۋەجايىندا وق اتىلعانى تۋرالى اقپارات تارادى، دەپ حابارلايدى قازاقپارات ءتىلشىسى.

الەۋمەتتىك جەلىلەردە «3- جەلتوقسان كۇنى «نۇرسۇلتان نازاربايەۆ» حالىقارالىق اۋەجايىنىڭ ۇشۋ ساپارلارىن ورتتەن جانە اپاتتان قۇتقارۋدى قامتاماسىز ەتۋ قىزمەتىنىڭ عيماراتىندا اۆياتسيالىق قاۋىپسىزدىك قىزمەتى ينسپەكتورى قارۋ تەكسەرىپ جاتقاندا قارۋ وزدىگىنەن اتىلىپ كەتىپ، ءۇش ينسپەكتور جاراقات الدى» دەگەن اقپارات تارادى.

حالىقارالىق اۋەجايدا وق اتىلعانىن كولىكتەگى پوليتسيا دەپارتامەنتىنىڭ باسپا ءسوز قىزمەتى راستادى.

«اتالعان فاكت ق ر قىلمىستىق كودەكسىنىڭ 114-بابى 3-بولىگى بويىنشا (دەنساۋلىققا ابايسىزدا جاراقات كەلتىرۋ) نۇر-سۇلتان قالاسىنداعى اۋەجايدىڭ پوليتسيا جەلىلىك ءبولىمىنىڭ تەرگەۋ بويىنشا ءبىرىڭعاي رەەسترىنە تىركەلدى. تەرگەۋ ءجۇرىپ جاتىر»، - دەپ حابارلادى پوليتسيا دەپارتامەنتىنىڭ باسپا ءسوز قىزمەتىنەن.