09:49, 06 - جەلتوقسان 2019 | GMT +5
ديماش قۇدايبەرگەن «ۆيكتوريا» سىيلىعىنىڭ ەكى اتالىمىندا جەڭىسكە جەتتى
الماتى. قازاقپارات - قازاقستاندىق ءانشى ديماش قۇدايبەرگەن رەسەيدىڭ «ۆيكتوريا» سىيلىعىندا ەكى نوميناتسيانى جەڭىپ الدى، دەپ حابارلايدى قازاقپارات.
ءانشى قۋانىشتى جاڭالىعىمەن Instagram پاراقشاسىندا ءبولىستى.
«قۇرمەتتى دوستار، مەن اسا قۋانىشپەن سىزدەرگە رەسەيلىك «ۆيكتوريا» مۋزىكالىق پرەمياسىندا ەكى اتالىمدا - «كلاسسيكالىق مۋزىكادا جىلدىڭ ءانشىسى» جانە «جىل جاڭالىعى» بويىنشا جەڭىسكە جەتكەنىمدى جەتكىزگىم كەلەدى. مەنىڭ بارشا الەمدەگى تىڭدارماندارىما قولداۋلارىڭىز ءۇشىن ۇلكەن راقمەت! بۇل جەڭىسىمدى الەمدەگى بارشا تىڭدارماندارىم #dears-قا ارنادىم»، - دەپ جازدى ديماش.
سونداي-اق، ول رەسەيدەگى كومانداسىنا جانە كومپوزيتور يگور كرۋتويعا ريزاشىلىعىن ءبىلدىردى.
«ۆيكتوريا» - وتكەن جىلدىڭ قورىتىندىسى بويىنشا ۇزدىك كاسىبي ونەرپازداردى - مۋزىكانتتاردى، ورىنداۋشىلاردى، كومپوزيتورلاردى، اقىنداردى، پروديۋسەرلەردى، جۋرناليستەردى تاڭدايتىن رەسەيدەگى العاشقى جانە جالعىز سىيلىق.
