ەلەكتروندى تەمەكى شىلىمدى تاستاۋعا كومەكتەسە مە؟

نۇر-سۇلتان. قازاقپارات – ەلەكتروندى تەمەكىنى پونسسيگارا نەمەسە ەسيگارەتا دەپ تە اتايدى. ول كادىمگى تەمەكىگە قاراعاندا اۋىرلاۋ جانە ۇزىنداۋ.

ورتاسىنا باتارەيكا مەن نيكوتينى بار كارتريدج سالىنادى. باتارەيكا كارتريدجدى قىزدىرىپ، نيكوتيننىڭ بۋى شىعادى. بۇل بۇيىمنىڭ باعاسى ارزان ەمەس. قۋات بەرگىش قۇرىلعىسىمەن بىرگە 14-35 مىڭ تەڭگە ارالىعىندا.

ەلەكتروندى تەمەكىلەردى 2003 -جىلى گونكونگتىق Ruyan Group Ltd كومپانياسى شىعارىپ، پاتەنتتەگەن ەكەن. ساتىپ الۋشىلار از بولعاندىقتان ماركەتولوگتار تىڭ يدەيا تاۋىپ، بۇل تەمەكىنى شىلىم شەگۋدى تاستاعىسى كەلەتىندەرگە ۇسىنعان. دەسە دە، ماماندار وسى ەلەكتروندى تەمەكىنىڭ قۇرامىن تىڭعىلىقتى زەرتتەپ ۇلگەرمەگەنگە ۇقسايدى. ياعني، جان-جاقتى زەرتتەۋدەن وتپەي تۇرىپ كوپشىلىككە تاراپ كەتكەن.

دۇنيەجۇزىلىك دەنساۋلىق ساقتاۋ ۇيىمى ەلەكتروندى تەمەكىنى پايدالانۋعا ءۇزىلدى-كەسىلدى قارسى. مۇنداي تەمەكىلەردە نيكوتيننىڭ مولشەرى وتە كوپ بولعاندىقتان، كەرىسىنشە، ادامنىڭ اعزاسىنىڭ ۋلانۋىنا سەبەپ بولادى، ەلەكتروندى تەمەكى شىلىم شەگۋدەن باس تارتۋ ءتاسىلى ەمەس، كەرىسىنشە ول دەنساۋلىققا ەلەۋلى نۇقسان كەلتىرەدى دەپ ەسەپتەيدى. سوندىقتان دا قۇرامى كۇماندى تەمەكىگە اۋەس بولماعان ءجون.