قازاقستاندىقتاردىڭ قاي ەلدەرگە ءجيى كەتەتىنى بەلگىلى بولدى
ەلىمىزگە كەلۋشىلەرگە قاراعاندا كەتۋشىلەردىڭ سانى باسىم، ولاردىڭ ايىرماشىلىعى 20 مىڭدى قۇرايدى.
«سىرتقى كوشى- قونعا كەلسەك، 2018 -جىلى ەلىمىزدەن كەتكەن جانە كەلگەندەردىڭ اراسى 20 مىڭ بولدى، وكىنىشكە قاراي كەتۋشىلەردىڭ سانى باسىم. 2018 -جىلى 29 مىڭ ازاماتىمىز ەلدەن كوشىپ كەتكەن. ەلدەن كەتۋشىلەردىڭ 96 پايىزى تمد ەلدەرىندە تۇراقتايدى. ونىڭ ىشىندە 89 پايىزى رەسەيگە كەتەدى. نەگە كەتەدى دەگەنگە كەلسەك، كوبىسى تاريحي وتانىنا ورالعىسى كەلگەندىكتەن، سونداي-اق، ساپالى ءبىلىم الىپ، جۇمىسقا ورنالاسۋ جانە تابىس تابۋ مەن لايىقتى ءومىر ءسۇرۋدى ىزدەگەندەر. ءيا، كەيدە جوعارى ساناتتى جانە تاپشى ماماندار شەتەلگە كەتىپ جاتادى. سول ۇشىندە ءبىز ەلىمىزدە جاعداي جاساۋىمىز كەرەك. ول ءبىلىم بەرۋدەن باستالادى. سەبەبى كوبىسى شەتەلگە ءبىلىم الۋعا بارادى دا، سول جاقتا قالىپ قويادى. بۇل ماقساتتا ءبىلىم جانە عىلىم مينيسترلىگى جۇيەلى جۇمىستار جۇرگىزىپ جاتىر»، - دەدى ق ر ەڭبەك جانە الەۋمەتتىك قورعاۋ ءمينيسترى ءبىرجان نۇرىمبەتوۆ.
سونداي-اق، مينيستر وتانداستارىمىز كوبىنەسە قاي ەلدەرگە كوشىپ كەتەتىندىگى تۋرالى تىلگە تيەك ەتتى.
«قازاقستاندىقتاردىڭ كوبىنەسە كەتەتىن ەلدەر قاتارىنا الدىمەن رەسەي، گەرمانيا جانە بەلارۋس ەلى. ال ىشكى ىستەر ورگاندارىنىڭ مالىمەتىنشە، 1 -جەلتوقسانداعى جاعداي بويىنشا قازاقستانعا 5,6 ميلليون ادام كىرىپ، الەمنىڭ 200 ەلىنەن 5,3 ميلليون شەتەلدىك ازامات شىعىپ كەتتى. ىشكى ىستەر ورگاندارىندا 1,2 ميلليون، ونىڭ ىشىندە: ت م د ەلدەرىنەن - 1,1 ميلليون، الىس شەتەلدەردەن - 95 مىڭ شەتەلدىك تىركەلگەن. 2210 جۇمىس بەرۋشىدە 22 مىڭعا جۋىق وزگە ەل ازاماتى، شەتەلدىك جۇمىس كۇشىن تارتۋ كۆوتاسى بويىنشا ەڭبەكتەنۋدە»، - دەدى ول.
ايتا كەتسەك، ەلوردادا «قازاقستانداعى كوشى-قون: پروبلەمالار، تەندەنسيالار، پەرسپەكتيۆالار» اتتى رەسپۋبليكالىق دوڭگەلەك ۇستەل ءوتتى. وندا ادام ساۋداسىنىڭ الدىن الۋ جانە ادام ساۋداسىنىڭ قۇرباندارىنا ارناۋلى الەۋمەتتىك قىزمەت كورسەتۋ، سونىمەن قاتار ىشكى، سىرتقى، ەتنيكالىق جانە زاڭسىز كوشى- قون ماسەلەلەرى تالقىلاندى.
اۆتور: ءالي يبرايەۆ
