اسقار مامين تۇركىستاندا جاڭا قۇرىلىس نىساندارىن ارالادى

تۇركىستان. قازاقپارات – ق ر پرەمەر- ءمينيسترى اسقار مامين بۇگىن تۇركىستان وبلىسىنا ءىس- ساپارمەن كەلىپ، وبلىس ورتالىعىندا سالىنىپ جاتقان ءبىرقاتار قۇرىلىس نىساندارىن ارالادى، دەپ حابارلايدى قازاقپارات ءتىلشىسى.

ۇكىمەت باسشىسى تۇركىستاننىڭ ىرگەسىندەگى شاعا اۋىلىندا سالىنىپ جاتقان جاڭا اۋەجايدىڭ قۇرىلىس بارىسىمەن تانىسىپ، تىكۇشاقپەن باقىلادى.

بيىل مامىر ايىندا ىرگەتاسى قالانعان اۋەجاي كەلەشەكتە حالىقارالىق جانە ىشكى رەيستەردە ساعاتىنا 250 ادام قابىلداۋعا قاۋقارلى بولماق. قۇرىلىس جۇمىستارىن تۇركيالىق «يدا ينشاات» كومپانياسى جۇرگىزۋدە.

تۇركىستان قالاسىنان 16 شاقىرىم قاشىقتىقتا ورنالاسقان اۋەجايدىڭ اۋماعى 905,3 گەكتار اۋماقتى الىپ جاتىر. وندا ۇشۋ- قونۋ جولاعى جانە باسقا دا نىساندار سالىنۋدا. قۇرىلىس جۇمىستارىنا 420 ادام تارتىلعان حالىقارالىق تەرمينال 2020 -جىلدىڭ جەلتوقسان ايىندا پايدالانۋعا بەرىلەدى دەپ كۇتىلۋدە.

پرەمەر- مينيستر، سونداي- اق، حالىقارالىق اۋەجايعا باراتىن جولدىڭ ساپاسىمەن دە تانىسىپ كوردى. 16,3 شاقىرىمعا سوزىلىپ جاتقان جولدىڭ قۇرىلىسى تامىز ايىندا باستالعان. وبلىستىق جولاۋشىلار كولىگى جانە اۆتوموبيل جولدارى باسقارماسىنىڭ تاپسىرىسىمەن سالىنىپ جاتقان جولدىڭ قۇرىلىسى كەلەر جىلدىڭ جەلتوقسانىندا اياقتالادى دەپ كۇتىلۋدە.

اسقار مامين ساپارى بارىسىندا تۇركىستان قالاسىنداعى اكىمشىلىك ىسكەرلىك ورتالىعىنىڭ قۇرىلىس جۇمىستارى بارىسىن ارالاپ كوردى. جاڭادان بوي كوتەرىپ جاتقان نىسانداردىڭ قۇرىلىسىمەن تانىسىپ، جاۋاپتىلارعا جۇمىستاردى قارقىنداتۋدى تاپسىردى.

تۇركىستان تۇرعىندارىنىڭ يگىلىگىنە ءبىرشاما ۋاقىتتان سوڭ بەرىلەتىن امفيتەاتر عيماراتىنىڭ قۇرىلىسى بيىل ءساۋىر ايىندا باستالعان بولاتىن. نىسان تولىقتاي سالىنىپ ءبىتىپ، تاياۋ كۇندەرى پايدالانۋعا بەرىلەدى دەپ كۇتىلۋدە.

ماڭعىستاۋ وبلىسى اكىمدىگىنىڭ سىيى رەتىندە سالىنعان نىسان 1000 ورىنعا لايىقتالعان. زاماناۋي كەشەننىڭ جالپى كولەمى 2400 شارشى مەتردى قۇرايدى.

«رۋحاني- مادەني ورتالىق» ايماعىنداعى 0,56 گەكتار جەرگە جۇرگىزىلىپ جاتقان قۇرىلىس الاڭىندا 60 جۇمىسشى ەڭبەك ەتۋدە. ۇكىمەت باسشىسى مۇنان كەيىن اقتوبە ءوڭىرىنىڭ تارتۋى رەتىندە سالىنىپ جاتقان دراما تەاتردىڭ قۇرىلىس جۇمىسىمەن تانىستى. اتالعان نىسان تۇركىستان مەن اقتوبە وبلىستارىنىڭ بىرىگىپ قارجىلاندىرۋىمەن جۇزەگە اسۋدا. 4 قاباتتان تۇراتىن عيماراتتىڭ جالپى كولەمى 9700 شارشى مەتردى قۇرايدى. بوي كوتەرىپ كەلە جاتقان مادەني وشاق زاماناۋي ۇلگىدە، بارلىق تالاپتارعا ساي سالىنۋدا.

عيماراتتا 510 ادامعا ارنالعان كورەرمەن زالى، ارنايى اۆتوتۇراق ورنى بولادى. جاڭا دراما تەاتردىڭ قۇرىلىسى وسى جىلدىڭ ماۋسىم ايىندا باستالىپ، 2020 -جىلدىڭ قازان ايىندا اياقتالادى دەپ جوسپارلانىپ وتىر.

اۆتور: اينۇر اقبايەۆا