قازاقستان مەن تۇركيا اسكەري دايارلىقتىڭ ءتارتىبىن ايقىندادى
كەلىسىمگە 2018 -جىلعى قىركۇيەكتە انكارادا قول قويىلدى.
«تۇركيا قازاقستاننىڭ ماڭىزدى ءارى نەگىزگى ستراتەگيالىق سەرىكتەستەرىنىڭ ءبىرى. وسى ۋاقىتقا دەيىن ەكى مەملەكەت اراسىنداعى اسكەري سالاداعى ىنتىماقتاستىق 1993 -جىلعى 8 - تامىزداعى اسكەري ءبىلىم سالاسىنداعى، سونداي- اق 1994 -جىلعى 23 - اقپانداعى اسكەري عىلىم، تەحنيكا جانە ءبىلىم سالاسىنداعى ىنتىماقتاستىق تۋرالى كەلىسىمدەر نەگىزىندە جۇزەگە اسىرىلىپ كەلەدى. جوعارىدا اتالعان حالىقارالىق شارتتاردىڭ كەيبىر ەرەجەلەرى ەكى مەملەكەتتىڭ قولدانىستاعى زاڭناماسىنا سايكەس كەلمەيدى جانە اسكەري سالاداعى ءىس- شارالاردى وتكىزۋ بويىنشا قارجىلىق شىعىستارمەن قامتاماسىز ەتۋ ءتارتىبى كوزدەلمەگەن. وسىعان بايلانىستى اسكەري ىنتىماقتاستىق سالاسىندا جاڭا كەلىسىم جاساۋ تۋرالى شەشىم قابىلدانعان بولاتىن»، - دەدى قر قورعانىس ءمينيسترىنىڭ ورىنباسارى تيمۋر داندىبايەۆ.
اتاپ ايتقاندا، قاراستىرىلىپ وتىرعان كەلىسىمنىڭ ماقساتى تاراپتار اراسىنداعى تەڭ قۇقىقتىق پەن ءوزارا تيىمدىلىك قاعيداتتارى نەگىزىندە اسكەري ىنتىماقتاستىقتى دامىتۋعا نەگىزدەلگەن. كەلىسىم اسكەري دايارلىق پەن وقىتۋدى قوسا العاندا، بۇدان بۇرىن قامتىلماعان بىرلەسكەن وقۋ- جاتتىعۋلاردى وتكىزۋ، اۋە كەڭىستىگى ارقىلى اسكەري مۇلىكتىڭ ترانزيتى، مەديتسينالىق كومەك كورسەتۋ، زاڭ قۇزىرەتتىلىگى، سونداي- اق باسقا دا ماسەلەلەردى كوزدەيدى.
«تۇركيا ارمياسىنىڭ الەمدەگى جاۋىنگەرلىك قابىلەتى مىقتى اسكەرلەردىڭ ءبىرى ەكەنىن نازارعا الساق، ءبىزدىڭ قارۋلى كۇشتەرىمىز تۇركيا اسكەرىنىڭ تاجىريبەسىن زەردەلەۋ مەن قولدانۋ ءۇشىن ىنتىماقتاستىق تەتىكتەرىن پايدالانۋعا مۇددەلى. كەلىسىمدى ىسكە اسىرۋ قورعانىس سالاسىندا ودان ءارى جەمىستى جانە ءوزارا ءتيىمدى ىنتىماقتاستىقتى دامىتۋعا ىقپال ەتەتىنىنە سەنەمىز»، - دەدى ول.
ت. داندىبايەۆتىڭ سوزىنە قاراعاندا، بيىلدان باستاپ تۇركيانىڭ 16 اسكەري قىزمەتشىسى قازاقستانداعى ۇلتتىق قورعانىس ۋنيۆەرسيتەتىندە ارنايى باعدارلاما بويىنشا ءبىلىم الۋدا.
بۇدان بۇرىن حابارلانعانداي، بۇگىندە تۇركيادا قازاقستاننىڭ 34 اسكەري قىزمەتشىسى وقىپ جاتىر.
اۆتور: رۋسلان عابباسوۆ
