الماتى ستۋدەنتتەرى فاريزا وڭعارسىنوۆانىڭ جىرلارىن وقۋدان جارىستى
تۇڭعىش رەت ۇيىمداستىرىلعان سايىستا الماتى قالاسىنداعى جوعارى وقۋ ورىندارىنىڭ ستۋدەنتتەرى باق سىنادى. قاتىسۋشىلار الدىن الا ونلاين داۋىس بەرۋ ارقىلى ىرىكتەلگەن. ارنايى بەينەبايان تۇسىرگەندەر اقتىق كەزەڭگە جولداما العان.
سايىس ءۇش باعىت بويىنشا ءوتتى. «جىرىڭ قالدى جانىمنىڭ ۇشقىنىنداي» كەزەڭىندە جاستار فاريزا وڭعارسىنوۆانىڭ ولەڭدەرىن ناقىشىنا كەلتىرىپ ورىندادى. «اۋەلەگەن اسەم ءان» تۋرىندا اقىننىڭ سوزدەرىنە جازىلعان مۋزىكالىق تۋىندىلار اۋەلەسە، «جىر جازامىن جۇرەكپەن» اتتى كەزەڭدە جۇرەكجاردى ارناۋ جىرلار ۇسىنىلدى.
قاتىسۋشىلاردىڭ ونەرىن جازۋشى، جۋرناليست بەيبىت سارىباي، اكتريسا نۇرگۇل مىڭعاتوۆا باعالادى.
«وتكەنگە كوز سالساق، قازاق ادەبيەتىنىڭ تاريحىندا ءومىرىن ولەڭگە ارناعان اقىن ايەلدەر از ەمەس. ولاردىڭ قاتارىندا ماريا حاكىمجانوۆا، زياش قالاۋوۆا، مارفۋعا ايتقوجينا، اقۇشتاپ باقتىگەرەيەۆا، قانيپا بۇعىبايەۆا، كۇلاش احمەتوۆا ەسىمدەرىن ەرەكشە اتاساق بولادى. وتكەن عاسىردىڭ 60-70-جىلدارى - كوزىقاراقتى كوپشىلىك «پوەزيا پاديشاسى» دەپ اسپەتتەگەن فاريزا وڭعارسىنوۆانى وسى ءتىزىمنىڭ كوش باسىندا، الدىڭعى ساپىندا تۇرعان ۇلت ادەبيەتىندە وزىندىك ورنەگى بار نازىكجاندىلاردىڭ ءبىرى ءھام بىرەگەيى دەپ اتاساق بولادى. تالاي ۇرپاق فاريزانىڭ شىعارماشىلىعىنا شىن سۇيسىنسە، كۇلاش پەن قانيپانىڭ، اقۇشتاپتىڭ ليريكاسىن جاتقا وقىدى»، - دەدى ۇيىمداستىرۋشىلار.
بايقاۋدىڭ «جىرىڭ قالدى جانىمنىڭ ۇشقىنىنداي» اتتى باعىتى بويىنشا باس جۇلدەنى ابىلاي حان اتىنداعى قازاق حالىقارالىق قاتىناستار جانە الەم تىلدەرى ۋنيۆەرسيتەتىنىڭ ستۋدەنتى جانار جەكسەنوۆا يەلەندى. ءبىرىنشى ورىنعا قازاق ۇلتتىق قىزدار پەداگوگيكالىق ۋنيۆەرسيتەتىنىڭ ستۋدەنتى نۇراي ايتبايەۆا، ەكىنشى جانە ءۇشىنشى ورىندارعا ءال-فارابي اتىنداعى قازاق ۇلتتىق ۋنيۆەرسيتەتىنىڭ ستۋدەنتتەرى قۇماربەك نۇركەن مەن ساعىنىش بالتاباي يە بولدى.
«اۋەلەگەن اسەم ءان» كەزەڭىندە قازاق ۇلتتىق قىزدار پەداگوگيكالىق ۋنيۆەرسيتەتىنىڭ ستۋدەنتى الۋا تۇماربايدىڭ جۇلدىزى جانىپ، ءبىرىنشى ورىندى قانجىعالادى. ەكىنشى ورىندى ءال-فارابي اتىنداعى قازاق ۇلتتىق ۋنيۆەرسيتەتىنىڭ ستۋدەنتتەرى ءجانالى بەكزاتحان مەن ماعجان داتقا ءوزارا بولىسسە، ءۇشىنشى ورىندى قىزدار ۋنيۆەرسيتەتىنىڭ ستۋدەنتى اقەركە جاھان قىزى ولجالادى.
«جىر جازامىن جۇرەكپەن» باعىتىندا ابىلاي حان اتىنداعى قازاق حالىقارالىق قاتىناستار جانە الەم تىلدەرى ۋنيۆەرسيتەتىنىڭ ستۋدەنتى ديانا ءىزباسار جۇزدەن جۇيرىك شىقتى. بۇل باعىتتا قىزدار ۋنيۆەرسيتەتىنىڭ ستۋدەنتى اقتولقىن جولاۋشىباي ءبىرىنشى ورىندى، ءال-فارابي اتىنداعى قازاق ۇلتتىق ۋنيۆەرسيتەتىنىڭ ستۋدەنتى قانات ەربولات ەكىنشى ورىندى جانە وسى وقۋ ورنىنىڭ ستۋدەنتى باۋىرجان اسقار ۇلى ءۇشىنشى ورىندى ەنشىلەدى.
جەڭىمپازدار «العىس حاتپەن»، ارنايى ديپلومدارمەن جانە باعالى سىيلىقتارمەن ماراپاتتالدى.
قازاق ۇلتتىق قىزدار پەداگوگيكالىق ۋنيۆەرسيتەتىندە وتكەن بايقاۋعا «اق قاۋىرسىن» جاستار شىعارماشىلىق كلۋبى ۇيىتقى بولدى.