نۇرسۇلتان نازاربايەۆ تۇركى ەلدەرى باسشىلارىن تۇركىستانعا شاقىردى
اتاپ ايتقاندا، ەلباسى «21 - عاسىرداعى ورتالىق ازيانى دامىتۋ ماقساتىندا تاتۋ كورشىلىك جانە ىنتىماقتاستىق تۋرالى شارتتى» بەس جاقتى فورماتتا جاساسۋدى ۇسىندى.
«بۇل ىرگەلى ساياسي قۇجاتتا ءبىزدىڭ ءوزارا ءىس- قيمىلىمىزدىڭ نەگىزگى قاعيداتتارى مەن ماقساتتارى كورسەتىلۋى كەرەك. كەلىسىمگە سونداي- اق ەلدەرىمىزدىڭ ەگەمەندىگى، تاۋەلسىزدىگى مەن اۋماقتىق تۇتاستىعىن ءوزارا قۇرمەتتەۋ تۋرالى ەرەجەلەر ەنەدى»، - دەدى نۇرسۇلتان نازاربايەۆ.
سونىمەن قاتار، ەلباسى ايماقتاعى قاۋىپسىزدىكتى نىعايتۋ ماقساتىندا كەلەسى جىلى ورتالىق ازيا ەلدەرىنىڭ قاۋىپسىزدىك كەڭەسى حاتشىلارىنىڭ كەزدەسۋىن وتكىزۋدى ۇسىندى. سونداي- اق، كەزدەسۋدە قازاقستاننىڭ تۇڭعىش پرەزيدەنتى قاتىسۋشى ەلدەردىڭ ۇكىمەتتەرىن دەموگرافيانىڭ جوعارى ديناميكاسىنا بايلانىستى پروبلەمالارعا نازار اۋدارۋعا شاقىردى.
«تاۋارلاردىڭ، قىزمەتتەردىڭ جانە كاپيتالدىڭ قوزعالىسىنا شەكتەۋ قوياتىن كەدەرگىلەردى الىپ تاستاۋ ارقىلى كەدەرگىسىز ورتالىق ازيانى قۇرۋعا قول جەتكىزۋ كەرەك»، - دەدى نۇرسۇلتان نازاربايەۆ.
سونىمەن قاتار، ەلباسى بارلىق مەملەكەت باسشىلارىن جاڭا مەرەكە – 15- ناۋرىزدى ورتالىق ازيا كۇنى رەتىندە بەلگىلەۋگە شاقىردى.
سونداي- اق مادەني- گۋمانيتارلىق سالاداعى ىنتىماقتاستىقتى نىعايتۋعا ەرەكشە نازار اۋدارىلىپ وتىر. ماسەلەن، وسى باعىت اياسىندا نۇرسۇلتان نازاربايەۆ قازاقستاننىڭ ەڭ ۇزدىك جوعارى وقۋ ورىندارىندا ءبىلىم الۋ قۇقىعىن بەرە وتىرىپ، ايماقتىڭ ءار ەلىنەن كەلگەن ستۋدەنتتەرگە 10 گرانت ءبولۋدى ۇسىندى.
«تۇركى الەمىنىڭ بەسىگى - تۇركىستان قالاسى قايتا تۇلەي باستادى. سونىمەن بىرگە ول ءوزىنىڭ مادەني، تاريحي جانە رۋحاني وزەگىن ساقتايتىنى ءسوزسىز. ءبىز ونى ورتاق ماقتانىشىمىزعا اينالاتىن كەرەمەت مەگاپوليس قىلامىز. سوندىقتان مەن ورتالىق ازيانىڭ باۋىرلاس مەملەكەتتەرىنىڭ باسشىلارىن كەلەسى جىلدىڭ كۇزىندە وسى كونە قالاعا شاقىرامىن»، - دەدى قازاقستاننىڭ تۇڭعىش پرەزيدەنتى.
ءسوز سوڭىندا ەلباسى ورتالىق ازيا ەلدەرىنىڭ مۇرالارىن كەڭەيتۋ جانە تەرەڭدەتۋ قاجەتتىگىن ايتتى.
فوتو: president.uz
اۆتور: ايان بەكەن ۇلى
