قاي قىزمەتتە بولساڭ دا جان-ءتانىڭدى سالىپ جۇمىس ىستەۋ كەرەك - ساعىنتايەۆ

نۇر-سۇلتان. قازاقپارات - الماتى قالاسىنىڭ اكىمى باقىتجان ساعىنتايەۆ ۇكىمەت باسشىسى مەن اكىم بولۋدىڭ ايىرماشىلى جايلى ويىمەن ءبولىستى، دەپ حابارلايدى قازاقپارات ءتىلشىسى.

الماتى قالاسى اكىمىنەن وكق- دا وتكەن باسپا ءسوز ءماسليحاتىندا «پرەمەر- مينيستر مەن اكىم لاۋازىمىنىڭ ايىرماشىلىعىن سەزىپ جاتىرسىز با؟» دەگەن سۇراق قويىلعان ەدى.

«پرەمەر-مينيستر بولماي تۇرىپ تا اكىم بولعانمىن. پاۆلودار وبلىسىندا قىزمەتتە بولدىم. اكىم بولىپ، پرەمەرلىككە - كەيىن قايتا اكىمدىككە كەلدىم. مۇنداي جۇمىس ىستەسەك - شارشاۋ دەگەن بولماۋ كەرەك. شابىتتانا اتقارعان ابزال. قاي قىزمەتتە بولساڭ دا جان- ءتانىڭدى بەرىپ، جۇمىس ىستەمەسەڭ - وتىرعان ورىننان ەشقانداي پايدا بولمايدى. ماسەلە باستىق بولعاندا ەمەس. قاي قىزمەتتە وتىرساڭ دا وسى»، - دەدى باقىتجان ساعىنتايەۆ.

الماتى قالاسىنىڭ اكىمى ءوز سوزىندە وزىنە ۇلكەن سەنىم ارتىلىپ وتىرعانىن ايتىپ ءوتتى.

«سەنىمدى اقتاۋ كەرەك. حالىقتىڭ ءۇمىتى زور. مىسالى، ۇكىمەت باسشىسىنان كەيىن اكىمنىڭ مۇمكىندىگى جوعارى. ويتكەنى، سەنىڭ كوزقاراسىڭ باسقاشا. پرەمەر بولعاندا بۇكىل قازاقستاننىڭ ەكونوميكاسىن قاراپ وتىردىم. ال مۇندا شەشىم شىعارۋ قابىلەتىڭ باسقاشا قالىپتاسادى. ۇلكەن تاجىريبەدەن وتەسىڭ. بۇل جونىندە جاساعان بەس ايدىڭ ىشىندە باعدارلامالارىمىز - ۇكىمەتتە جينالعان تاجىريبەنىڭ ناتيجەسى»، - دەدى ول.

اۆتور: ايان بەكەن ۇلى