پاۆلودارلىق مۋزەيدە ەلباسىنىڭ جەكە زاتتارى كورمەگە قويىلدى
«ەلباسىنىڭ بەس قىرى» جوباسى اياسىندا ۇيىمداستىرىلعان كورمەدە ەلباسىنىڭ بالالىق شاعىنىڭ كۋاسى بولعان - وقۋشى كەزىندە وتىرعان پارتاسى مەن العاش قولىنا ۇستاعان دومبىراسى، شاپانى سياقتى قۇندى زاتتاردى كەزدەستىرۋگە بولادى.
كورمەنىڭ اشىلۋىنا كەلگەن پاۆلودارلىقتار اۋەلى نۇرسۇلتان ءابىش ۇلى نازاربايەۆتىڭ بالالىق شاعىن سۋرەتتەيتىن «بالالىق شاعىمنىڭ اسپانى» دەرەكتى فيلمىندە ەلباسى ومىرگە كەلگەن جايلاۋ مەن شامالعان اۋىلىندا تۇرعان ءۇيدىڭ تولىق كورىنىسىن تاماشالادى. بۇدان كەيىن ەلباسى ءوزى ايتقان بالالىق شاعى تۋرالى اڭگىمەسىنە تۇسىرىلگەن بەينەفيلم ۇسىنىلدى. وبلىستىق گ. ن. پوتانين اتىنداعى تاريحي- ولكەتانۋ مۋزەيىنىڭ ولكە تاريحىن عىلىمي قامتاماسىز ەتۋ ءبولىمىنىڭ باسشىسى دينارا وپابەكوۆانىڭ ايتۋىنشا، مەرەكەگە وراي ۇيىمداستىرىلعان كورمە 4 بولىمنەن تۇرادى.
«بۇل بولىمدەر نۇرسۇلتان ءابىش ۇلىنىڭ بالالىق شاعىمەن تىكەلەي بايلانىستى. ەلباسىنىڭ بالا كەزىندەگى ارمانىنىڭ ءبىرى - ۇشقىش بولۋ ەدى. ول تەك ارمان كۇيىندە قالسا دا ءبىز كورمەگە ۇشاقتىڭ ماكەتىن قويۋدى ءجون كوردىك. سونداي- اق، قازاق ەلىن الما مەن قىزعالداقتىڭ وتانى دەپ جاتامىز. جالپى العاندا الما مەن قىزعالداقتىڭ دا تۇڭعىش پرەزيدەنتىمىزدىڭ بالالىق شاعىندا الاتىن ورنى ەرەكشە. بۇدان بولەك، ول كىسى بالا كەزىندە سپورتقا دە وتە جاقىن بولعان. سوندا جەتكەن جەتىستىكتەرى مەن ماراپاتتارىن دا قامتۋعا تىرىستىق»، - دەيدى دينارا وپابەكوۆا.
سونىمەن قاتار، كورمەدەن ەلباسىنىڭ جازعان كىتاپتارىن جانە پاۆلودار وڭىرىنە جاساعان ساپارى كەزىندە تۇسىرىلگەن فوتوسۋرەتتەردى دە كەزدەستىرۋگە بولادى. جالپى 150 گە جۋىق ەكسپونات قويىلعان كورمەدەن ەكسكليۋزيۆتى زاتتار ورىن العان.
«ايماعىمىزداعى ەلەكتروليز زاۋىتى مەن اليۋميني زاۋىتىنىڭ ەكىنشى قاتارى اشىلعان كەزدە ەلباسى ءوزى كەلىپ قاتىسىپ، اليۋمينيدىڭ ءبىر كەسەگىن ۇستاپ تۇرىپ سۋرەتكە تۇسكەن ەكەن. ال 1997 -جىلى سول زاۋىت سالىنادى دەپ نەگىزى قالانعان كەزدە دە ول كىسى قولىنا قالاقشا العان. وسى تاريحي ساتتەردىڭ بارلىعى تاسپالانعان سۋرەتتەر كورمەنىڭ ءبىر بولىگىن الىپ تۇر. جۋىردا مۋزەي قورىنا اليۋميني زاۋىتى وسى قۇندى سۋرەتتەر مەن ەلباسى ءوز قولىمەن ۇستاعان اليۋمينيدىڭ كەسەگىن جانە قالاقشانى بىزگە بەرگەن بولاتىن. بۇگىنگى كورمەگە قويىلعان ەرەكشە زاتتاردىڭ بىرەگەيى - وسىلار»، - دەپ اتاپ ءوتتى دينارا وپابەكوۆا.
