كوز اينالاسىنداعى اجىمدەرگە قارسى ماسكالار

نۇر-سۇلتان. قازاقپارات – كوز اينالاسىنداعى اجىمدەر پايدا بولعان كەزدە ادامدار ۋاقىتتىڭ ءوتىپ جاتقانىن، ءوزىنىڭ قارتتىققا جاقىنداۋدا ەكەنىن ايناعا قاراعان سايىن سەزەدى. سودان كوڭىلى قاپا بولادى.

ەندەشە سول قاپا بولعان ادامدار كوز  ماڭىنداعى اجىمدەردى ازايتۋعا كۇش سالادى. ءبىز سونىڭ بىرنەشەۋىن ۇسىنامىز. جالپى كوز جانىنداعى ميميكالىق اجىمدەر ەرتە پايدا بولادى. جاستايىنان كوز اينالاسىنداعى تەرىنى كۇتىپ، اجىمدەردىڭ الدىن الا ءبىلۋ ءلازىم.

قولدان جاسالعان ماسكالاردىڭ ءبىر ەرەكشەلىگى، قۇرامىنا قوسىلاتىن ينگرەديەنتتەردىڭ ساپاسىنا سەنىمدى بولا الاسىز. سىزدەرگە بىرنەشە ماسكالاردىڭ جاسالۋىمەن تانىستىرماقپىز:

اقجەلكەن (پەترۋشكا) ماسكاسى. 1 كىشىگىرىم اقجەلكەن شوعىرىن ۇساقتاپ تۋراپ، 1 اس قاسىق قايماقپەن ارالاستىراسىز. تۇزەلگەن قوسپانى كوز اينالاسىنداعى تەرىگە جاعىپ، 20 مينۋتتان كەيىن جىلى سۋمەن جۋىپ تاستايسىز. اقجەلكەن ماسكاسى تەرىنى قۇنارلاندىرىپ، ۇساق اجىمدەردى جازادى.

ءجۇزىم ماسكاسى. بىرنەشە ءجۇزىم جيدەگىن ەزىپ، سۋىن ماقتا سۋلىعىمەن كوز اينالاسىنداعى تەرىگە جاعادى. 20 مينۋتتان كەيىن جۋىپ تاستاساڭىز بولادى نەمەسە جاتار الدىندا جاعىپ، تۇنگە قالدىرساڭىز دا بولادى. وسىلايشا، تەرىگە تابيعي قۇنارلى زاتتار سىڭەدى، ال بۇل اجىمدەردىڭ پايدا بولۋىنىڭ الدىن الادى.

بالدان جاسالاتىن ماسكا. 1 شاي قاسىق بالدى جۇمىرتقانىڭ سارىسىمەن ارالاستىرىپ، بىرنەشە تامشى ءزايتۇن مايىن قوسىڭىز. الىنعان قوسپانى كوزىڭىزدىڭ اينالاسىنا جاعىڭىز. 30 مينۋتتان كەيىن جىلى سۋمەن جۋىپ تاستاڭىز.

شيپالى شوپتەردەن جاسالاتىن تۇنبا. 1 شاي قاسىق كەپتىرىلگەن جوكە، تۇيمەداق، قىرمىزى مەن كوكتىكەندى ارالاستىرىپ، 3 ستاقان ىستىق سۋ قۇيىڭىز. جارتى ساعاتتان كەيىن كوز اينالاسىنا ارنالعان كومپرەسس جاسايسىز. بۇنى كۇندەلىكتى جاتاردا جاساۋعا بولادى.

دەرەككوز: Reactor