ورالدا كۇيەۋى تۇتقىنعا العان ايەل بوساتىلدى

نۇر-سۇلتان. قازاقپارات - ورال قالاسىندا تۇتقىندى بوساتۋ وپەراتسياسى ءساتتى ءوتتى، دەپ حابارلايدى قازاقپارات ءتىلشىسى ق ر ىشكى ىستەر مينيسترلىگىنىڭ باسپا ءسوز قىزمەتىنە سىلتەمە جاساپ.

«ورال قالاسىندا تۇتقىندى بوساتۋ وپەراتسياسى ءولىم-ءجىتىمسىز جانە اۋىر سالدارسىز اياقتالدى. پوليتسيا ارنايى جاساعى قارۋ مەن ارنايى قۇرال-جابدىق قولدانباستان قاسكۇنەمدى ۇستادى. وپەراتسيا ساعات 19-45 تە (نۇر-سۇلتان ۋاقىتىمەن 20-45 تە) اياقتالدى. جۇبايىن كەپىلگە العان ازاماتپەن كەلىسسوز جۇرگىزۋشىلەر ساعات 13-10 نان باستاپ كەلىسسوز جۇرگىزىپ، ول 6 ساعاتتان استام ۋاقىتقا سوزىلدى. ديالوگقا ونىڭ جاقىن تۋىستارى مەن دوستارى دا ارالاستى. ۇزاققا سوزىلعان كەلىسسوزدەردەن كەيىن ول ايەلىن بوساتتى جانە سودان كەيىن ونى ارنايى جاساق قىزمەتكەرى ۇستادى»، - دەپ اتاپ وتەدى مينيسترلىكتەن.

ۆەدومستۆو مالىمەتىنشە، تۇتقىندا بولعان ايەلدىڭ اياعىندا پىشاق جاراقاتى بار. زارداپ شەگۋشىنى مەديتسينا قىزمەتكەرى قارادى جانە قازىرگى ۋاقىتتا ونىمەن پسيحولوگتار جۇمىس ىستەپ جاتىر.

وقيعا بولعان ماڭداعى ۇيلەردىڭ تۇرعىندارى مەن سول ماڭعا جاقىن جۇرگەن ادامدار تاياۋ جەردەگى ورتا مەكتەپ عيماراتىنا ورنالاستىرىلىپ، جىلىتۋ پۋنكتى جاساقتالعان.

«ق ر ق ك 261-بابى بويىنشا سوتقا دەيىنگى تەرگەۋ باستالدى. قازىرگى ۋاقىتتا قورشاۋ الىنىپ جاتىر. سودان كەيىن تۇرعىندار ءوز ۇيلەرىنە ورالا الادى»، - دەدى ۆەدومستۆودان.

اۆتور: مارلان جيەمباي