قازاقستاندا كەزەكتەن تىس پارلامەنتتىك سايلاۋ وتەتىنى راس پا

نۇر-سۇلتان. قازاقپارات - قازاقستاندا الداعى جىلى كەزەكتەن تىس پارلامەنتتىك سايلاۋ وتە مە؟ بۇل سۇراققا «اشىق ديالوگ» باعدارلاماسىندا ق ر اقپارات جانە قوعامدىق دامۋ ءمينيسترى داۋرەن ابايەۆ جاۋاپ بەردى، دەپ حابارلايدى قازاقپارات ءتىلشىسى.

«ۇمىتپاسام، بۇعان دەيىن دە «كۇزدە پارلامەنتتىك سايلاۋدىڭ وتەتىنى انىق» دەگەن پايىم- پىكىرلەر جەلدەي ەسكەن ەدى. ال قازىر جىلدىڭ جەلتوقسانى كەپ قويدى. «Nur Otan» پارتياسىنىڭ كەز كەلگەن دەرلىك بەلسەندىلىگى - بىردەن كەزەكتەن تىس سايلاۋعا دايىندىق سەكىلدى قابىلداناتىن بولىپتى. ءبىراق، ءبىزدىڭ كورىپ وتىرعانىمىز - ءبارى قاراپايىم پروتسەسس، پارتيانىڭ ەلەكتوراتارالىق جۇمىسى عانا. ونىڭ ۇستىنە پارتيانىڭ بارلىق سالاسىن قايتا جانداندىرۋ مىندەتىن قويدى. ءسوزسىز، ايماقتاردى تارتپاسا، بۇل ءىستىڭ ءساتتى بولماسى انىق»، - دەدى مينيستر.

داۋرەن ابايەۆ نۇرسۇلتان نازاربايەۆتىڭ «Nur Otan» فيليالدارى وكىلدەرىمەن كەزدەسۋىنەن نە تۇيگەنىن ايتىپ بەردى.

«البەتتە، ايتىلعان ەڭ ماڭىزدى ماسەلەلەردىڭ ءبىرى - ءماسليحات دەپۋتاتتارىنىڭ پارتيالىق جاۋاپكەرشىلىگىن كۇشەيتۋ. بۇگىنگى كۇنى وزدەرىڭىز جاقسى بىلەتىندەي، جەرگىلىكتى باسقارۋ ءىسى جاقسى جەتىلىپ كەلەدى. اۋداندار مەن اۋىل اكىمدىكتەرىنىڭ باسىم بولىگى قازىرگى ۋاقىتتا وزدىگىنەن بيۋدجەتتى ءتۇزىپ، جۇمساي الادى. ياعني، ولار قاراجاتتى قايدا جۇمساۋدى شەشەدى. بۇل رەتتە ايماقتاردى دامىتۋداعى ستراتەگيالىق شەشىمدەردى قابىلداۋدا دا ءماسليحاتتاردىڭ ءرولى كۇشەيەدى. وسى رەتتە سايلاۋالدى ۋادەلەردى ورىنداۋدا پارتيانىڭ دەپۋتاتتارىنا ەرەكشە جاۋاپكەرشىلىك جۇگى ارتىلاتىنى انىق»، - دەدى داۋرەن ابايەۆ.

اۆتور: ايان بەكەن ۇلى