ۇلتتىق قاۋىپسىزدىك كوميتەتىنىڭ قىزمەتكەرىنە پارا بەرمەك بولعان قىتاي ازاماتتارى ۇستالدى
بۇل جونىندە ۇ ق ك باسپا ءسوز قىزمەتى حابارلادى.
«2019 -جىلدىڭ 19-قاراشاسىندا ۇلتتىق قاۋىپسىزدىك قىزمەتىنىڭ اتىراۋ وبلىستىق دەپارتامەنتى اتىراۋ قالاسىنىڭ مامانداندىرىلعان تەرگەۋ سوتىنىڭ سانكسياسىمەن ۇ ق ك قىزمەتكەرىنە 2 ميلليون تەڭگە پارا بەرۋ بارىسىندا ەكى قىتاي ازاماتى ۇستاپ، تەرگەۋ يزولياتورىنا قامادى»، - دەلىنگەن ۆەدومستۆا تاراتقان مالىمدەمەدە.
ۇ ق ك مالىمەتىنشە، پارا اتىراۋ اۋماعىندا زاڭسىز جۇمىس ىستەگەن شەتەل ازاماتىنىڭ ءىسىن سوتتا جاعىمدى جاعىنان كورسەتۋ ءۇشىن بەرىلگەن. بۇدان بولەك، شەتەلدىكتەر ۇ ق ك قىزمەتكەرىنە الداعى ۋاقىتتا دا قىتاي ازاماتتارىنا قامقورلىق جاساعانى ءۇشىن ايىنا 200 مىڭ تەڭگە سىياقى بەرىپ تۇرۋعا ۇسىنىس جاساعان. ۇستالعان ازاماتتار ءوز كىنالارىن مويىنداعان. قازىر تەرگەۋ جۇمىستارى جۇرگىزىلۋدە.
فوتو: ۇ ق ك باسپا ءسوز قىزمەتى
