جەتىسايدا قازاقى سالتتى ساقتاعان تاجىك وتباسى تۇرادى
قازاق پەن تاجىك ۇلتىنىڭ اراسىنداعى دوستىقتى قۇدالىقپەن ۇشتاستىرعان فاريدا اقىلبەكوۆانىڭ پەرزەنتتەرى اۋىل شارۋاشىلىعى اينالىسىپ، كاسىپكەرلىك سالاسىن دۇرىس جولعا قويعان، دەپ حابارلايدى قازاقپارات ءتىلشىسى.
وتاعاسى باحتيار قازىبايەۆ پەن وتاناسى فاريدا اقىلبەكوۆانىڭ شاڭىراق كوتەرگەندەرىنە بيىل 47 -جىل تولىپ وتىر. تاجىك ۇلتىنا كەلىن بولىپ تۇسكەن قازىعۇرت اۋدانىنىڭ تۋماسى بۇگىندە 2 قىز بەن 3 ۇلدىڭ اناسى اتانعان. بەس پەرزەنتىنەن 25 نەمەرە مەن 15 شوبەرە ءسۇيىپ وتىرعان فاريدا اپا قازىبايەۆتار شاڭىراعىنا كەلىن بولىپ تۇسكەن كۇننەن باستاپ كۇنى بۇگىنگە دەيىن قوناقتاردى قازاقى سالت- داستۇرمەن، قازاقى داستارحانمەن كۇتىپ كەلەدى.
بوساعاسىن اتتاعان كەلىندەرى دە ەنە جولىمەن ءجۇرىپ، فاريدا اپانىڭ تاربيەسىنە قانىققان. نەمەرەسى ساردور بولسا وسىدان 2 جىل بۇرىن 100 ورىندىق «زۋۆايدا انا» بوبەكجاي بالاباقشاسىن اشقان. قازىرگى تاڭدا مۇندا 30 عا تارتا اۋىلدىڭ قىز-كەلىنشەگى تۇراقتى جۇمىسپەن قامتىلعان. بيىلعى جىلى دياگنوستيكالىق ورتالىق پەن 200 ورىندىق مەكتەپالدى دايىندىق ورتالىعىنىڭ قۇرىلىسىن جۇرگىزۋدە.
زامان تالابىنا ساي ورتالىقتا 100 ءبۇلدىرشىن بالاباقشا باعدارلاماسىمەن تاربيەلەنسە، جوعارعى توپتاعى 100 ءبۇلدىرشىن مەكتەپكە دايىندىق كورىپ، ساباق وقيتىن بولادى. بۇل ورتالىق ىسكە قوسىلسا اۋىلدىڭ تاعى 35-40 تۇرعىنى جۇمىسپەن قامتىلماق.
«قازاقستاندى مەكەن ەتكەن بارلىق ۇلت پەن ۇلىستى ناسىلىنە، ءدىني كوزقاراسىنا، سەنىمىنە قاراماي بىردەي جاعداي جاساعان مەملەكەت باسشىسىنا، ۇكىمەتكە العىس ايتامىز. ديحانشىلىقپەن اينالىسام دەگەندەرگە دە، كاسىپكەرلىكتى جولعا قويامىن دەگەندەرگە دە كەڭ جول اشىلعان. مەملەكەتتىك باعدارلامالار ارقىلى ۇلكەن قولداۋ بار. مىنە، سونىڭ ناتيجەسىندە ءبىز دە ءوز كاسىبىمىزدى دوڭگەلەندىرىپ وتىرمىز»، - دەيدى فاريدا اقىلبەكوۆا.
ايتا كەتەيىك، بۇل وتباسى ءۇش مىڭعا تارتا تۇرعىنى بار شاعىن عانا اۋىلدا بوي كوتەرىپ جاتقان ورتالىقتىڭ الدىنان جاس كاسىپكەر دەمالىس اللەياسىن دا سالۋدى كوزدەپ وتىر. وندا اۋىل بالالارى مەن تۇرعىندارىنا ارنالعان ويىن الاڭشالارى، گۇلدەر اللەياسى، بالمۇزداق ورتالىعى مەن سۋ بۇرقاقتار جۇمىس ىستەيتىن بولادى.
اۆتور: اينۇر اقبايەۆا
