اسكەري دارىگەرلەر جەدەل ەمدەۋدىڭ جاڭا ءادىسىن قولداندى

نۇر-سۇلتان. قازاقپارات – ق ر ق م باس اسكەري كلينيكالىق گوسپيتالى تراۆماتولوگيا ءبولىمىنىڭ دارىگەرلەرى العاش رەت اسكەري قىزمەتشىنىڭ تىزە بۋىنىنىڭ پاتولوگياسىن جاڭا ادىستەمە بويىنشا جەدەل ەمدەدى، دەپ حابارلايدى قازاقپارات قورعانىس مينيسترلىگىنىڭ باسپا ءسوز قىزمەتىنە سىلتەمە جاساپ.

تراۆماتولوگيا ءبولىمىنىڭ باستىعى، مەديتسينا قىزمەتىنىڭ پودپولكوۆنيگى ادىلەت اقتايەۆتىڭ ايتۋىنشا، جوسپارلانعان وپەراتسيا ارتروسكوپيالىق قۇرال- جابدىقتاردىڭ كومەگىمەن وتكىزىلگەن.

مۇنداي وپەراتسيالىق ەمدەۋدىڭ ەرەكشەلىگى - مونيتور ارقىلى بەينەباقىلاۋ مەن باقىلاۋدى پايدالانۋ. بۇل ءوز كەزەگىندە وپەراتسيادا جاراقاتتىڭ از بولۋىنا سەپتەسەدى. مانيپۋلياتسيالار كەسپەي- اق، تەك تەسۋ ارقىلى ورىندالادى. بۇل ناۋقاستىڭ تەز قالپىنا كەلۋىنە سەپتىگىن تيگىزەدى.

اسكەري گوسپيتال حابارلاعانداي، قازىرگى ۋاقىتتا وپەراتسيا جاسالعان اسكەري قىزمەتشى ءوزىن جاقسى سەزىنىپ، اياققا تۇرىپ كەلەدى. كەلەسى اپتادا اسكەري دارىگەرلەر يىق بۋىنىنىڭ پاتولوگياسى بار باسقا ناۋقاستى جەدەل ەمدەمەك.