س ءى م: قازاقتاردىڭ قىتايدان قازاقستانعا كەلۋ ماسەلەسى شەشىمىن تاۋىپ كەلەدى

نۇر-سۇلتان. قازاقپارات - سىرتقى ىستەر ءمينيسترىنىڭ ءبىرىنشى ورىنباسارى شاحرات نۇرىشەۆ قىتايداعى قازاقتاردىڭ ماسەلەسى قالاي شەشىلىپ جاتقانىن ايتىپ بەردى، دەپ حابارلايدى قازاقپارات ءتىلشىسى.

«كەيىنگى كەزدەرى قىتايداعى قانداستارىمىزعا بايلانىستى نەشە ءتۇرلى اڭگىمەلەردىڭ تاراۋىنا بايلانىستى وسى تۋرالى قىسقاشا مالىمەت بەرىپ كەتەيىن. مينيسترلىك قانداستارىمىزدىڭ ماسەلەسىن شەشۋ ماقساتىندا قىتاي تاراپىمەن تىعىز ديالوگ ورناتىپ، ءتۇرلى كەلىسسوزدەر مەن كونسۋلتاتسيالار وتكىزۋدە. 

وزدەرىڭىزگە ءمالىم، 2017 -جىلدان باستاپ قىتاي حالىق رەسپۋبليكاسىنىڭ شىنجاڭ-ۇيعىر اۆتونوميالىق ولكەسىندەگى ميگراتسيالىق رەجىمنىڭ جانە تەرروريزمگە قارسى كۇرەستىڭ كۇشەيۋىنە بايلانىستى قىتايداعى قانداستارىمىزدىڭ قازاقستانعا شىعۋ ماسەلەسى قيىندادى. دەي تۇرعانمەن، ديپلوماتيالىق ارنالار ارقىلى اتقارىلعان شارۋالاردىڭ ناتيجەسىندە قازاقتاردىڭ قىتايدان قازاقستانعا شىعۋ ماسەلەسى دۇرىس شەشىمىن تابۋدا»، - دەدى شاحرات نۇرىشەۆ ەلوردادا وتكەن «وتانداستار. بولاشاققا باعدار» اتتى حالىقارالىق دوڭگەلەك ۇستەلىندە.

ونىڭ ايتۋىنشا، قىتايلىق تاراپتىڭ مالىمەتى بويىنشا قانداستاردىڭ قىتايدان قازاقستانعا شىعۋىنا قويىلعان شەكتەۋ الىنىپ تاستالعان.

«تەك قىتايدىڭ زاڭدارىن بۇزعاندارعا عانا شەكتەۋ قويىلاتىنى ەسكەرتىلدى. 2019 -جىلدىڭ قاڭتار- قاراشا ارالىعىندا ەلىمىزدىڭ قىتايداعى كونسۋلدىق جانە ديپلوماتيالىق مەكەمەلەرىنەن 38393 ەتنيكالىق قازاق ۆيزاسىن الىپ، قازاقستانداعى تۋىستارىمەن قاۋىشتى. قوس ازاماتتىعى ءۇشىن قىتايدان شىعا الماي جۇرگەن 35 قازاقتىڭ 30 ى بوساتىلىپ، ەلىمىزگە ورالدى»، - دەدى ول.

شاحرات نۇرىشەۆتىڭ ايتۋىنشا، قازاقستاننىڭ قولدانىستاعى زاڭناماسىنا سايكەس، قازاقستان ازاماتتىعىن جەڭىلدەتىلگەن تارتىپپەن قابىلداعان ەتنيكالىق قازاقتار قازاقستاننىڭ قىتايداعى ديپلوماتيالىق وكىلدىكتەرى ارقىلى قىتاي ازاماتتىعىنان شىعۋ ماسەلەسىن رەسىمدەپ جاتىر.

«قىتايدىڭ قازاقستانداعى ەلشىلىگىنىڭ رەسمي مالىمەتى بويىنشا، سوڭعى 1,5 جىل ىشىندە 6,5 مىڭنان استام ەتنيكالىق قازاق قىتاي ازاماتتىعىنان شىعارىلدى. الايدا شىنجاڭداعى كوشى-قون سالاسىنا ەنگىزىلگەن جاڭا تارتىپكە بايلانىستى مەملەكەتتىك قىزمەتتەگى، قۇقىق قورعاۋ ورگاندارىندا قىزمەت ەتەتىن، اسكەري بورىشى بار جانە پارتيا مۇشەلەرى بولىپ تابىلاتىن قازاقتاردىڭ قىتاي ازاماتتىعىنان شىعۋ ماسەلەسى ءالى دە بولسا شەشىمىن تاپپاي وتىر. دەگەنمەن، مينيسترلىك بۇل ماسەلەنى ءوز باقىلاۋىندا ۇستاپ، قىتاي تاراپىمەن جۇيەلى جۇمىستاردى جالعاستىرۋدا. وسى رەتتە قىتايداعى قانداستارىمىزعا قازاقستان مەن قىتايدىڭ زاڭنامالارىنا سايكەس، قوس ازاماتتىققا جول بەرمەۋ كەرەكتىگىن تاعى دا ەسكەرتە ايتقىم كەلەدى» - دەپ ءتۇيدى شاحرات نۇرىشەۆ.

اۆتور: ايان بەكەن ۇلى