ءبىلىم ءمينيسترى ج و و-لاردى جابۋ قۇقىعىن العىسى كەلەدى
بۇل تۋرالى بۇگىن اتالعان ۆەدوموستۆونىڭ باسشىسى اسحات ايماعامبەتوۆ ايتتى، دەپ حابارلايدى قازاقپارات ءتىلشىسى.
«بۇگىندە شەشىمدى سوت قابىلدايدى. ال ءبىز مەملەكەتتىك ورگان رەتىندە ليتسەنزيا بەرگەننەن كەيىن وكىلەتتى ورگان رەتىندە اتالعان ليتسەنزيانى قايتارىپ الۋ، ايىرۋ قۇقىعىمىز بولۋى قاجەت. بۇل نورما تاياۋ ارادا بەرىلەدى دەپ ۇمىتتەنەمىن»، - دەدى مينيستر ءماجىلىستىڭ جالپى وتىرىسىنان كەيىن ب ا ق وكىلدەرىنە بەرگەن سۇحباتىندا.
ونىڭ اتاپ وتۋىنشە، مۇنداي نورما قازىرگى ۋاقىتتا ماجىلىستە تالقىلانىپ جاتقان زاڭ جوباسىندا كورىنىس تاپقان.
«ماجىلىستە اكىمشىلىك كودەكسكە وزگەرىستەر تالقىلانىپ جاتىر. بۇل نورما قابىلدانادى دەپ ۇمىتتەنەمىن. اتالعان نورمانىڭ قابىلدانۋى ءبىلىم جانە عىلىم مينيسترلىگىنە ج و و-لار بىلىكتىلىك تالابىنا ساي بولماعان جاعدايدا جەدەل ءارى ءتيىمدى ارەكەت ەتۋىنە مۇمكىندىك بەرەدى»، - دەدى ول.
اسحات ايماعامبەتوۆتىڭ دەرەگىنشە، بۇگىندە قازاقستاندا جوعارى وقۋ ورىندارىنىڭ سانى وتە كوپ.
«بىزدە جوعارى وقۋ ورىندارى وتە كوپ. ەگەر ولار تالاپقا ساي بولماسا، وندا ءبىز ولاردى جابامىز. قازىرگى ۋاقىتتا ستۋدەنتتەردىڭ باسقا جوعارى وقۋ ورىندارىنا اۋىسۋىن اۋىرپالىقسىز جۇرگىزۋ مۇمكىندىكتەرىن قاراستىرىپ جاتىرمىز. سەبەبى مۇنان ستۋدەنتتەر زارداپ شەكپەۋى قاجەت»، - دەدى مينيستر.
اۆتور: مارلان جيەمباي
