نۇرتاي ابىقايەۆ وبلىستارداعى دوستىق ۇيلەرىنەن قانداستاردى قابىلداۋ بولمەسىن اشۋدى ۇسىندى
«شەت ەلدەگى وتانداستار مەن قازاق مادەني ورتالىقتارىن قولداۋ ماقساتىندا شەكارالىق وبلىستارمەن مەموراندۋمدارعا قول قويۋ ارقىلى شەت ەلدەردەگى قازاق مادەني ورتالىقتارىنا قامقورلىق جاساۋدى قولعا الدىق. الايدا الدىمىزدا ءالى دە تالاي اسۋ بار. ءتۇيىنى تارقاماعان تۇيتكىلدەر، كۇرمەۋى شەشىلمەگەن كۇردەلى جايتتەر دە جوق ەمەس. وسى ورايدا «وتانداستار قورى» جۇمىسىنىڭ تيىمدىلىگى مەن ناتيجەلىلىگىن ارتتىرۋعا بايلانىستى ءبىرقاتار ۇيىمداستىرۋ ماسەلەلەرىن كەشەۋىلدەتپەي شەشۋ كەرەك دەپ ويلايمىز»، - دەدى ول.
نۇرتاي ابىقايەۆتىڭ ايتۋىنشا، «وتانداستار» قورىنىڭ بارلىق وبلىستاردا قانداستارعا قوعامدىق قابىلداۋ جۇرگىزەتىن مامانى بار. الايدا، ارنايى قوعامدىق قابىلداۋ بولمەلەرى جوق.
«وسى رەتتە ەلگە ورالعان قانداستارعا قوعامدىق قابىلداۋدى ساپالى دەڭگەيدە وتكىزۋ ءۇشىن وبلىس باسشىلارىنان «قازاقستان حالقى اسسامبلەياسى» باعدارلاماسى بويىنشا قۇرىلعان «دوستىق ۇيلەرىنەن» دەربەس ورىن بەرۋدى سۇرايمىز. ەكىنشىدەن، وبلىستىق اكىمدىكتەردىڭ اقپارات تاقتالارىندا جانە رەسمي سايتتارىندا بايلانىس ورتالىعىنىڭ جۇمىسى جايىندا اقپارات ورنالاستىرۋ تۋرالى حات وسى جىلدىڭ قىركۇيەك ايىندا جىبەرىلدى. الايدا وعان 205 اۋداندىق جانە وبلىستىق اكىمدىكتەردىڭ وسى ۋاقىتقا دەيىن تەك 9 ى عانا جاۋاپ بەردى. وسى ماسەلەنى ەسكەرە وتىرىپ، جەرگىلىكتى اتقارۋشى ورگانداردان اقپاراتتىق جۇمىستاردى جۇيەلى جۇرگىزۋگە ناقتى قولداۋ كورسەتۋىن سۇرايمىز»، - دەدى ول.
ونىڭ ايتۋىنشا، قانداستاردىڭ قۇجاتتارىن وبلىستىق قوعامدىق ۇيىمداردىڭ ارنايى اۋدارماشىلارى اۋدارادى.
«سوندىقتان ول قۇجاتتاردى دۇنيەجۇزى قازاقتارى قاۋىمداستىعى وبلىستىق فيليالدارىنىڭ باسشىلارى راستاعانى دۇرىس. ءبىزدىڭ ەندىگى باستى مىندەتىمىز - شەت ەلدەردەگى قانداستار تۋرالى جيناقتالعان مالىمەتتەردى جۇيەلەپ، قوسىمشا زەرتتەۋلەر جۇرگىزىپ، عىلىمي نەگىزدە تۇجىرىمداۋ»، - دەدى ول.
ەسكە سالا كەتسەك، ەلوردادا دۇنيە ءجۇزىنىڭ تۇكپىر-تۇكپىرىنەن كەلگەن قانداستاردىڭ قاتىسۋىمەن «وتانداستار. بولاشاققا باعدار» اتتى حالىقارالىق دوڭگەلەك ۇستەل ءوتىپ جاتىر.
اۆتور: ايان بەكەن ۇلى
