مەسسيدىڭ ورنىن كىم باسادى؟

نۇر-سۇلتان قازاقپارات - «التىن دوپتىڭ» بەس دۇركىن يەگەرى ليونەل مەسسي بۇرىنعى كوماندالاسى، قازىرگى «پاري سەن- جەرمەننىڭ» ويىنشىسى نەيماردى ءوزىنىڭ «بارسەلوناداعى» ءىزباسارى سانايدى.

France Football باسىلىمى جاقىندا وسى قۇپيانىڭ شەتىن اشتى. «بارسەلونا» «ليۆەرپۋلدەن» (3:0، 0:4) وزا الماي، چەمپيوندار ليگاسىنىڭ جارتىلاي فينالىنان ۇشىپ كەتكەن سوڭ مەسسي نەيمارعا بىلاي دەپ حات جولداعان: «ءبىز تەك بىرىكسەك قانا چەمپيوندار ليگاسىن جەڭە الامىز. سەنىڭ ورالعانىڭدى قالايمىن. ەكى جىلدان كەيىن كەتكەننەن سوڭ، سەن مەنىڭ ورنىمدى باساسىڭ». بۇعان قاراپ مەسسي بۇرىنعى ارىپتەسى نەيماردى ءوزىنىڭ ءىزىن باسۋشى رەتىندە كورەتىنىن بايقاۋعا بولادى. برازيليالىق فۋتبولشى 2017 -جىلى رەكوردى 222 ميلليون ەۋروعا پ س ج كومانداسىنا اۋىسسا دا بۇرىنعى ارىپتەستەر جاقسى قارىم- قاتىناستا ەكەنىن جاسىرمايدى. فۋتبولشىلار بىرنەشە مارتە باس قوسىپ، نەيماردىڭ كومانداعا ورالۋىن تالقىلاعان. نەيمار دا سوڭعى ۋاقىتتا كومانداسىن اۋىستىرعىسى كەلەتىنىن ايتىپ كەلەدى.

ول پاريجدە باقىتتى ەمەس ەكەنىن، بارسەلوناداعى قۋانىشتى كۇندەرىن ساعىنىشپەن ەسكە الاتىنىن سۇقباتتارىندا ايتقان. بيىل جازعى ترانسفەر كەزىندە نەيمار «بارسەلوناعا» ورالۋعا تىرىسىپ تا كورگەن. الايدا فۋتبولشى كومانداسىمەن كەلىسە الماعان. نەيمار 2013 -جىلى «بارسەلوناعا» اۋىسىپ، مەسسيمەن يىق تىرەسىپ بىرگە ويناعان.

ول كاتالوندىق كوماندادا وتكىزگەن ءۇش جىلدا يسپانيا چەمپيوناتىندا ەكى مارتە توپ جارىپ، چەمپيوندار ليگاسى مەن ۋەفا سۋپەركۋبوگىن جەڭىپ العان. ال مەسسي بولسا «بارسەلونادا» 2004 -جىلدان بەرى ويناپ كەلەدى. كاتالوندىق كلۋبتىڭ ساپىندا 692 ماتچقا قاتىسىپ، 604 گول سوققان. ازىرگە ونىڭ ناقتى قاشان كوماندادان كەتەتىنى بەلگىسىز. الايدا سوڭعى ۋاقىتتاردا ارگەنتينالىق فۋتبولشى 2021 -جىلعا دەيىن جاسالعان كەلىسىمشارتىنىڭ ۋاقىتى بىتكەندە مانسابىن اياقتايتىنى تۋرالى قاۋەسەت تاراپ كەتتى.