پالۋان، ءانشى، كومپوزيتور بالۋان شولاق تۋرالى فيلم ەفيرگە شىعادى

نۇر- سۇلتان. قازاقپارات - «بالۋان شولاق» تولىقمەتراجدى كوركەم فيلمى العاش رەت تەلەەكراننان كورسەتىلەدى، دەپ حابارلايدى قازاقپارات.

ايتا كەتەيىك، ق ر مادەنيەت جانە سپورت مينيسترلىگىنىڭ تاپسىرىسى بويىنشا ءتۇسىرىلىپ، بيىلعى جىلدىڭ كوكتەمىندە ۇلتتىق پروكاتقا شىققان تاريحي تۋىندى 1 -جەلتوقسان – ق ر تۇڭعىش پرەزيدەنتى كۇنى قارساڭىندا «Qazaqstan» ۇلتتىق تەلەارناسىنىڭ ەفيرىنەن كورسەتىلەدى.

جازۋشى- دراماتۋرگ دۋلات يسابەكوۆتىڭ «جاۋجۇرەك» پەساسىنىڭ جەلىسى بويىنشا تۇسىرىلگەن تۋىندى قازاق پالۋانى، ءانشى ءارى كومپوزيتور بالۋان شولاقتىڭ ومىرىنە ارنالعان جانە داڭقتى تۇلعا تۋرالى تۇڭعىش فيلم. وندا بالۋان شولاق ءرولىن تانىمال تەاتر جانە كينو اكتەرى ەركەبۇلان دايىروۆ سومدايدى.

كينولەنتادا اتاقتى پالۋاننىڭ جەكە ءومىرى مەن وسكەن ورتاسى، انشىلىگى مەن سازگەرلىك قىرىنان وزگە، قيلى تاعدىرى مەن تۋعان ەلىنە دەگەن شەكسىز ماحابباتى كورىنىس تابادى. كورەرمەن ونى تەك الىپ كۇش يەسى عانا ەمەس، ۇلت مۇددەسىنە قىزمەت ەتكەن تۇلعا رەتىندە تانيتىن بولادى.

كينوكارتينا وسى كۇندەرى ءۇندىستاننىڭ گوا شتاتىندا ءوتىپ جاتقان 50- حالىقارالىق كينوفەستيۆالگە «الەمدىك پرەمەرا» باعدارلاماسى بويىنشا ۇسىنىلىپ، الەم كينوگەرلەرى تاراپىنان جوعارى باعاعا يە بولدى.

تاريحي فيلمدى كوپشىلىك «Qazaqstan» ۇلتتىق ارناسىنىڭ ەفيرىنەن 30 -قاراشا كۇنى ساعات 22:40 تا جانە 1 -جەلتوقسان كۇنى ساعات 12:20 دا كورە الادى.