تۇركيادا «قۇتتى بىلىك» كىتابىنىڭ بالالارعا ارنالعان قازاقشا اۋدارماسى جارىق كوردى
كىتاپ تۇركيانىڭ استاناسى انكارا قالاسىندا جارىق كورگەندىكتەن وسى قالادا وقىپ جاتقان قازاقستاندىقتارعا، وسىندا ءومىر سۇرەتىن قازاق وتباسىلارىنا جانە قازاقستاننان كەلگەن قوناقتارعا تاراتىلىپ جاتىر.
بۇل كىتاپ العاشقىدا تۇرىك تىلىندە جارىق كورىپ، كەيىننەن تۇركى حالىقتارىنىڭ تىلدەرىنە اۋدارىلدى. قازىرگى تاڭدا اۋدارمالار اراسىنان تەك قازاق تىلىندەگى نۇسقاسى عانا باسىلىپ شىقتى.
كىتاپتىڭ تۇرىك تىلىندە وسى شىعارمانى زەرتتەۋشى تۇركيالىق عالىم ەركان گوكسۋ مەن وقىتۋشى فاتيح اكمان دايىندادى. قازاق تىلىنە گازي ۋنيۆەرسيتەتىنىڭ دوكتورانتى ەرجان ارعىنبايەۆ پەن ءال- فارابي اتىنداعى قازاق ۇلتتىق ۋنيۆەرسيتەتىنىڭ دوكتورانتى اينۇر احمەتوۆا اۋدارعان.
«كىتاپتى تۇرىك نەمەسە وزگە دە تۇركى تىلدەرىنە جاريالاۋداعى ماقسات - بىرىنشىدەن، قۇتتى بىلىكتىڭ جازىلعانىنا 950 جىل تولۋىمەن بايلانىستى. ال ەكىنشىسى، قۇتتى بىلىك جالپى تۇركى حالىقتارىنا ورتاق شىعارما جانە ونىڭ تاربيەلىك ءمانى وتە جوعارى. سول سەبەپتى مۇنى بالالارعا لايىقتاپ شىعارۋ جانە جاستاردىڭ ءوزىمىزدىڭ بابالارىمىزدىڭ شىعارمالارىمەن تاربيەلەنۋىنە ۇلەس قوسۋ كوزدەلدى»، - دەدى گازي ۋنيۆەرسيتەتىنىڭ دوكتورانتى ەرجان ارعىنبايەۆ.
بالالارعا ارنالعان «قۇتتى بىلىك» كىتابىن «ۇلكۇ وجاكلارى» ءبىلىم جانە مادەنيەت قورى تۇرىك جانە تۇركى تىلدەرىندە دايىنداتىپ، شىعاردى. كىتاپ تۇركى تىلدەرىنەن بولەك ورىس، اعىلشىن، نەمىس جانە تاعى باسقا تىلدەرگە دە اۋدارىلىپ جاتىر.
بۇل جاڭالىقتى ەستىگەن سوڭ كىتاپ تۋرالى قىزىعۋشىلىق ءبىلدىرىپ قازاقستاننان دا وقىرماندار سۇراتىپ جاتقان كورىنەدى.
«قازىرگى تاڭدا كىتاپ جايلى ەستىپ، سۇراعان ادامدارعا انكارادان قازاقستانعا باراتىن ادامدار ارقىلى كىتاپتى بەرىپ جىبەرىپ جاتىرمىز. الايدا، قازاقستاندا تاراتىلۋى نەمەسە ساتىلۋى جايلى ءالى ناقتى ەشنارسە ايتا المايمىز. ەگەر كىتاپتىڭ ەلىمىزگە جەتكىزىلۋىنە ەلشىلىك نەمەسە باسقا تاراپتاردان قولداۋ كورسەتىلەتىن بولسا، كىتاپتىڭ ەكىنشى باسىلىمىن شىعارىپ قازاقستانعا جىبەرۋگە بولار ەدى»، - دەدى ەرجان ارعىنبايەۆ.
اۆتورلاردىڭ ايتۋىنشا، «قۇتتى بىلىك» كىتابىنىڭ تۇرىك تىلىندەگى نۇسقاسىنىڭ ءبىرىنشى، ەكىنشى جانە ءۇشىنشى باسىلىمدارى 10000، ال ءتورتىنشى باسىلىمى 50000 تيراجبەن شىققان بولاتىن. قازاق تىلىندەگى نۇسقاسى 1000 دانامەن شىقتى. كىتاپتىڭ تارالۋىنا جانە وقىرمانداردىڭ سۇرانىسىنا قاراي الداعى ۋاقىتتا ەكىنشى، ءۇشىنشى باسىلىمدارى دا جارىققا شىعۋى مۇمكىن.
اۆتور گۇلميرا عوسمانالي
