دۇكەندە ساتىپ الۋشى رەتىندە ءوز قۇقىعىڭىزدى بىلەسىز بە؟

نۇر-سۇلتان. قازاقپارات - ازىق-تۇلىك دۇكەندەرىندە ساتىپ الۋشى مەن ساتۋشىلاردىڭ اراسىندا تۇسىنىسپەۋشىلىكتەر ورىن الىپ جاتادى.

مىسالى، ءسىز ءبىر بوتەلكە سۋسىندى الامىن دەپ، بىرنەشەسىن قۇلاتىپ الدىڭىز. ەگەر دە دۇكەن ساتۋشىسى نەمەسە مەنەدجەرى سىزگە جارامسىز بولىپ قالعان بارلىق بوتەلكەنىڭ اقشاسىن تولە دەسە، نە ىستەيسىز؟ ءسىز ءوز قۇقىعىڭىزدى بىلەسىز بە؟

1. ءسىز تاۋاردى قۇرتىپ نەمەسە ءبۇلدىرىپ الدىڭىز

زالدىڭ ورتاسىندا تۇرعان بىرنەشە بوتەلكەگە قولىڭىز ءتيىپ كەتىپ، بارلىعىن شاعىپ الدىڭىز. ءسىز ول تاۋاردىڭ اقشاسىن تولەمەسەڭىز، زات ءالى دە دۇكەنگە تيەسىلى. قىزمەتكەرلەر تاۋاردى قابىلدانعان نورماتيۆتەرگە سايكەس ورنالاستىرۋعا مىندەتتى. سوندىقتان، زالدىڭ ورتاسىندا شولمەكتەردەن پيراميدانى قۇراۋ نەمەسە سورەدەن ەدەنگە دەيىن قويۋ ارقىلى ساتىپ الۋشىلاردىڭ قولايسىز جاعدايىنا سەپتىگىن تيگىزەدى.

2. ەگەر دە سومكەڭىزدى بەينە باقىلاۋ ورىنىنا تاستاۋدى سۇراسا...

زاڭ بويىنشا، دۇكەنگە كىرەردە ساتىپ الۋشىلار جەكە زاتتارىن سىرتقا تاستاپ كەتۋگە مىندەتتى ەمەس. كەرىسىنشە، ءسىز قارسى پىكىر ايتقاندا، سومكەڭىزدى بەينە باقىلاۋعا تاستاماعىنىڭىز ءۇشىن ءسىزدى دۇكەنگە كىرگىزبەي قويۋعا ولار قۇقىلى ەمەس. بۇل جاعدايدى كۇزەتشىگە نەمەسە دۇكەننىڭ مەنەدجەرىنە ءتۇسىندىرىپ ايتىڭىز.

3. ەگەر دە بەينە باقىلاۋدا تۇرعان زاتىڭىز جوعالسا...

ءسىز زاتتارىڭىزدى بەينە باقىلاۋعا قالدىرىپ، ارتىنشا جەكە زاتىڭىز ورنىندا جوق بولسا، بىردەن كىنانى دۇكەننىڭ نەمەسە سۋپەرماركەتتىڭ اكىمشىلىگىنەن ىزدەڭىز. جانە جوعالعان زاتىڭىزدىڭ اقشاسىن تولىقتاي تولەۋگە ولار مىندەتتى.

4. ەگەر دە كۇزەتشى ءسىزدىڭ سومكەڭىزدى نەمەسە كيىمىڭىزدى تەكسەرگىسى كەلسە...

نەگىزىنەن دۇكەندە تۇرعان كۇزەتشىلەردىڭ قۇقىق قورعاۋ ورگاندارىنا قاتىسى جوق. ولار جەكە كومپانيانىڭ قاۋىپسىزدىك قىزمەتكەرى بولىپ تابىلادى. ەشقانداي ارنايى پروتوكولسىز ولار ءسىزدى تىنتۋگە قۇقىلى ەمەس. سوندىقتان ارنايى پوليتسيا قىزمەتكەرىن شاقىرىڭىز.

5. «مەندە مايدا جوق! ءىرى اقشانى اۋىستىرىپ، مايدالاپ كەلىڭىز!»

سىزدەن مايدا اقشا بەرۋدى نەمەسە ءسىزدى باسقا كاسساعا بارۋدى وتىنسە، ءسىز ارى- بەرى جۇرۋگە مىندەتتى ەمەسسىز. بۇل - زاڭسىز. دۇكەن ديرەكتورى كاسساداعى اقشانىڭ مايدا- ىرىسىنە باقىلاۋ جاساۋعا مىندەتتى. سوندىقتان ءسىز بۇل ماسەلەنى شەشۋدى تالاپ ەتە الاسىز.

6. سورەدە باسقا باعا، كاسسادا باسقا باعا

ءسىز سورەدەن تاۋاردى الىپ، كاسساعا باردىڭىز. الايدا، كاسسير ءسىزدىڭ زاتىڭىزدى كومپيۋتەرگە ەنگىزگەننەن سوڭ بارىپ سىزگە سورەدەگى باعانى اۋىستىرۋدى ۇمىتىپ كەتكەنىن ايتىپ، باسقا باعا كورسەتىپ تۇر. ءسىز بۇل كەزدە دۇكەن اكىمشىلىگىنەن تاپ سول سورەدەگى باعانى تالاپ ەتە الاسىز.

7. جاپسىرىلعان باعانىڭ استىندا باسقا باعا تىعىلىپ تۇرسا...

مۇنداي جاعدايلار ءىرى سۋپەرماركەتتەردە كوبىرەك ورىن الادى. سەبەبى بەلگىلى ءبىر ۋاقىتتاردا ارنايى تاپسىرىسپەن ولاردىڭ باعالارى وزگەرىپ وتىرادى. مۇنداي كەزدە ساتۋشىلار سول باعالاردى الىپ تاستاۋدىڭ ورنىنا ۇستىنە جاڭا باعانى جاپسىرا بەرەدى. ءسىز مۇنى بايقاعان جاعدايدا دۇكەنگە كەلىپ زاتتىڭ باعاسىن سايكەستەندىرىپ، اقشاڭىزدى قايتارىپ الۋىڭىزعا بولادى.

OINET. KZ